عبد اللطيف منيع، بطل مصر في المصارعة الرومانية، اتعرض لاعتداء من مجهولين في محافظة الدقهلية، عبد اللطيف حكى التفاصيل ل"مصراوي" وقال إنه كان في طريقه لنادي دكرنس وعلى بعد ١٠٠ متر من النادي، وقفه أحد الأشخاص واتكلم معاه بطريقة مش كويسة ورفع عليه سلاح أبيض “مطواة”، لكن فشل يعمله أي حاجة ومشي، رجع بعدها البلطجي ومعاه ١١ شخص، ضربوا عبد اللطيف وقطعوله هدومه وصوابعه، ولولا إن الناس تدخلت في الشارع كان ممكن الموضوع يتطور عن كده، ولما اتسأل عبد اللطيف عن معرفته بالناس دي، قال إنه ماعندوش فكرة هم مين، بس معروف تواجدهم كتير جنب النادي ومعروف إنهم بلطجية وبيتعاطوا مخدرات.

وزارة الشباب والرياضة متواصلتش مع عبد اللطيف لحد دلوقتي، الإصابة هتمنعه من المشاركة في أكبر بطولة هتدخلها مصر في الوزن اللي بيمثله، وهي بطولة أفريقيا اللي هتقام في فبراير اللي جاي، عبد اللطيف مالوش بديل وده معناه إن مصر مش هيتم تمثيلها في البطولة. عبد اللطيف قال إنه صعب الدولة تلحق تجهز حد في أقل من شهر، خاصة إن الدولة صرفت عليه كتير جدًا -حوالي مليون جنيه- عشان تجهزه للبطولة.