كل سنة وأنت طيب، 2017 خلصت، عجبتك؟ مش هتفرق، هي أكيد مش مهتمة. سيبك منها وخلينا في الرياضة، إيه أكتر اللقطات الرياضية اللي أنت فاكرها للسنة دي؟ حاجات حلوة أو وحشة، جايز إنجازات أو وكسات عادي. إنجازات العرب في الرياضة مش كتير أوي عمومًا، بس هي أكيد أكتر من 17 بكتير، بس القايمة دي مافيهاش إنجازات بالتحديد، بس فيها لقطات لازم تفضل الرياضة العربية فاكراها وفخورة بيها، أو مكسوفة منها! أشهر 17 لقطة رياضية في سنة 2017. افتكرهم معانا وزود عليهم وبارك الله فيما رزق. اللقطات غير مرتبة زمنيًا بالمناسبة

1- مصر رجعت للكان

بداية 2017 كان فيها حدث مهم، مصر رجعت للمشاركة في كاس الأمم الأفريقية. من ساعة التتويج ببطولة 2010، ماصعدش المنتخب المصري للبطولة، وفوتنا 3 نسخ في 2012 و 2013 و 2015. الجميل كمان إن المنتخب قدر يوصل لنهائي البطولة، أينعم خسرنا النهائي، بس لما تغيب عن بطولة قوية زي دي 7سنين، وترجع توصل للفاينال، فأكيد ده كويس. لو كانت عندك تحفظات على أداء المنتخب في البطولة وإدارة كوبر للماتشات، ممكن ترجع للموضوع ده

2- البطولة العربية –كاس التميز في البتنجان المخلل-

بعد غياب وشوقة، أو من غير شوقة بصراحة، الاتحاد العربي لكورة القدم، قرر يرجع بطولة الأندية العربية، اللي هي بطولة مالهاش أي تلاتة لازمة بس العرب بيستعرضوا فيها قدرتهم المالية على دفع مبالغ طائلة في بطولة مالهاش أي تلاتة لازمة برضه. المهم إن رجعت البطولة ومصر نظمتها، وأكتر حاجة حماسية في البطولة كانت الخناقة اللي حصلت في ماتش الفيصلي الأردني والترجي التونسي، بقية اللقطات لا تستحق الذكر

3- انسحاب الزمالك من ماتش المقاصة – لقطة الموسم-

هي أكيد لقطة الموسم لما لاعيبة نادي مصر المقاصة، نزلوا الملعب يستنوا لاعيبة نادي الزمالك علشان يبدأوا ماتش في بطولة الدوري، وهوب لاعيبة الزمالك ماجاتش. أقسم بالله لو حاجزين ساعتين في ملعب نادي "طلائع الفرسان" بتاع زهراء مصر القديمة، والفريق اللي هنلاعبه ماجاش، لتطير فيها رقاب وتتوقع عليهم عقوبات وغرامات واحتمال العيال دي ماتشوفش أمهاتها تاني.

4- الغواص صدام كيلاني

إنجازات الرياضات التانية غير الكورة، مش بتاخد حقها بشكل كبير. في واحد السنة دي، قرر إنه عاوز يكون صاحب الرقم القياسي في أطول عدد ساعات غطس تحت المياه. صدام كيلاني مانجحش في كسر الرقم العالمي، بس نجح إنه يكون صاحب الرقم الأغلى في الشرق الأوسط ولسه هيحاول تاني، وعاش حياة كاملة تحت المياه لأكتر من 100 ساعة.

5- منتخب سوريا –كان فاضله تكة ويوصل كاس عالم-

في الوقت اللي مابتسمعش فيه عن سوريا غير الحروب والدمار وأخبار مناطق سيطرت عليها داعش ومناطق سيطرت عليه قوات بشار ودم ونكد كتير، المنتخب السوري فضل "يدحلب" لحد ما لاقيناه عاوز يدخل كاس العالم. في النهاية سوريا ماوصلتش للملحق النهائي وخرجت قدام استراليا، بس عملوا حاجة ماتتناسبش مع ظروف البلد وإمكانياتهم، وخلوا القهاوي كلها تقعد تتفرج على ماتشاتهم ويهتفوا ليهم، على أمل تحصل معجزة تعوض العرب كلهم عن اللاشئ اللي بيتقدم للقضية السورية.

6- الإسكواش المصري –ورقة وقلم واكتبي ورايا يا ست الكل-

هو الكلام عن لقطات لاعيبة الإسكواش المصريين في 2017، محتاج ليست منفصلة، اللعبة دي المصريين واخدينها ملاكي بقالهم فترة، بس أكيد أهم لقطة كانت في ختام السنة، تحديدًا في بطولة العالم، لما كان أطراف النهائي كلهم مصريين، رجالة وستات، لما محمد الشوربجي فاز على أخوه ورنيم الوليلي فازت على نور الشربيني. ولقطة احتفال رنيم مع جوزها يتعمل عليها 4 حلقات من برنامج "معكم" لمدام منى الشاذلي

7- انتخابات الأندية –بيبو بيبو بيبو الله يا خطيب-

مصر كلها عارفة إن الأهلاوية بقالهم سنين طويلة بيحضروا نفسهم لليوم اللي هيمسك فيه الخطيب رئاسة النادي. بعد ما حسن حمدي ومجلسه مشيوا بسبب بند ال8 سنين في قانون الرياضة القديم، الحلم ده بعد شوية، بس رجع الخطيب مرة تانية علشان يكتسح انتخابات النادي الأهلي. انتخابات الزمالك كمان كان فيها أكبر جمعية عمومية في تاريخه، بس النتيجة كانت محسومة من البداية، ده مايمنعش إن مرتضى منصور فرجنا على كام لقطة حلوة، وحاليًا بيلعب قط وفار مع نائبه المنتخب هاني العتال، في قلب النادي.

8- الأهلي بطل الدوري والكاس لأول مرة من 10 سنين

بما إننا مكملين مع الأهلي المصري، ف2017 كانت المرة الأولى اللي الفريق يجمع فيها بطولتين الدوري والكاس من 10 سنين، من ساعة ما عملها في 2007. هو ماخدش الكاس من 2007 أساسًا، فأكيد دي كانت سنة مميزة للأهلي، مابوظهاش بس غير خسارة بطولة افريقيا قدام الوداد المغربي، بس يلا معلش

9- رجوع النشاط الكروي في الكويت

الفيفا بيقفش على أي تدخل حكومي في مجال الرياضة، وممكن توصل لوقف النشاط الرياضي، وهي وصلت لكدة فعلًا في الكويت، بس في آخر 2017، الموضوع اتلحق والحمدلله رجع النشاط الكروي ورئيس الفيفا عمل زيارة للكويت وباسوا راس بعض. الفكرة إن ماحدش أخد باله من الحوار أصلًا، يلا، اللي يشوف بلاوي الناس تهون عليه بلوته.

10- فريدة عثمان –أول ميدالية سباحة في بطولات العالم-

آخر لاعبة سباحة كانت نجمة والناس بتسمع عنها، كانت الله يمسيها بالخير رانيا علواني، بس دلوقتي في فريدة عثمان. فريدة 2017 بالنسبالها كانت سنة عظيمة، وبالنسبالنا أكيد كناس فرحانة بإنجازها، بعد ما كسبت ميدالية برونزية في بطولة العالم في المجر، تحديدًا في منافسات سباق 50 متر فراشة، الميدالية دي هي أول إنجاز مصري في بطولات العالم للسباحة. فريدة عثمان من أهم شخصيات العرب الرياضية في 2017

11- محمد إيهاب -3 ميداليات رفع أثقال في بطولة العالم-

الإنجازات بتاعت الألعاب الفردية، خصوصًا الألعاب المهمشة، هي أكتر حاجة تستحق نركز عليها وأصحابها يستحقوا التكريم؛ ناس دايمًا بره الضوء، بيمارسوا لعبة مش منتشرة وبأقل إمكانيات، أوقات كتير بيدربوا على حسابهم ومابيحققوش مكاسب مالية من إنجازاتهم، وفوق كله ده بيتنافسوا مع ناس سابقينهم بسنين.

محمد إيهاب، البطل الأوليمبي المصري، حقق 3 ميداليات دهب في بطولة العالم لرفع الأثقال، بعد ما سبق إنه حقق ميدالية في أوليمبيات ريو 2016. في نفس البطولة، حققت بطلتنا الأوليمبية سارة سمير، ميدالية ذهبية، وهي كمان سبق وحققت ميدالية أوليمبية في ريو. 2 أبطال حصدوا جزء من تعبهم في2017.

12- سارة عصام – أول لاعبة كورة مصرية تحترف في الدوري الإنجليزي-

بعيدًا عن إن معظم الرجالة شايفين إن الكورة لعبة رجالي، في بنت مصرية احترفت في الدوري الإنجليزي. سارة عصام بقت أ,ل لاعبة كرة قدم نسائية مصرية تحترف، وماحترفتش في أي مكان، دي راحت الدوري الإنجليزي، وتحديدًا ستوك سيتي، تزامل رمضان صبحي هناك بقى.

13- ماجي مجدي -15 جول في ماتش واحد

دي بقى لقطة تضحك وفريدة وغريبة من نوعها، ماجي مجدي بتلعب كورة قدم في نادي المعادي، جابت في ماتش واحد 15 جول، بعد ما فاز فريقها بنتيجة 18-0 على فريق التنمية سبورت. 15 جول في 90 دقيقة، يعني تقريبًا كانت بتجيب جول كل 6 دقايق، علشان كدة مش بنقتنع غير إنها لعبة رجالي.

باقي لقطات السنة، لازم تكون مخصصة للإنجازات العربية في مجال كرة القدم، عندك مثلًا:

14- العرب في الدوري الإنجليزي:

غير محمد صلاح اللي العالم كله بيتكلم عنه، هنلاقي إن في 3 لاعيبة مصريين بيشاركوا بشكل مستمر مع فرقهم في الدوري الإنجليزي، هما أحمد حجازي ومحمد النني ورمضان صبحي، غير أحمد المحمدي وسام مرسي، اللي بيشاركوا مع أندية أستون فيلا وويجان، في القسمين التاني والتالت بإنجلترا. ومن غير المصريين، المغربي سفيان بوفال بيقدم مستويات كويسة مع فريق محترم زي ساوثهامبتون، والجزائريين رياض محرز وإسلام سليماني، موجودين مع فريق ليستر، بطلة نسخة 2016، وإن كان الأخير قريب من البيع أو الإعارة لفريق تاني.

15- محمد صلاح أحسن لاعب في أفريقيا:

إلى جانب كونه ثاني هدافي الدوري الإنجليزي بعد مهاجم توتنهام هاري كين، وفاز بجايزة أحسن لاعب في الدوري عن شهر نوفمبر، صلاح كمان توج بجايزة أحسن لاعب في أفريقيا المقدمة من هيئة الإذاعة البريطانية BBC وهو أقوى المرشحين للفوز بجايزة الكاف الرسمية، وكانت 2017 وش السعد عليه، بعد انتقاله بمبلغ 36 مليون باوند من روما الإيطالي لليفربول الإنجليزي.

16- مصر في كاس العالم –أخيرًا-

في كام دقيقة ما بين لحظة تعادل الكونغو وضربة جزاء تريزيجيه، أنا فقدت النطق في الكام دقيقة دول، ودار قدام عيني شريط من الذكريات، من أول فرصة طارق السعيد في المغرب، مرورًا بمنتخب تارديلي وكورة بركات في الجزاير وصورة تريكة وهو بيصرخ ويخلع التيشرت في ماتش كوماسي. أهم لحظة لكل المصريين من سنين، مصر في كاس العالم روسيا 2018، وعلشان مدحت شلبي محظوظ، تترسخ اللقطة دي في الوعي الجمعي للمصريين وهو بيقول صلااااااح.

17- لأول مرة 4 منتخبات عربية في كاس العالم

العرب لموا بعض وطالعين كلهم على روسيا، دي المرة الأولى اللي تحصل فيها، لا وإيه كمان، المنتخبات كلها جاية البطولة بعد شوقة، يعني مصر ماصعدتش من سنة 90، المغرب من 98 وتونس من 2006 والسعودية من 2006. الباد نيوز إن مصر والسعودية وقعوا في مجموعة واحدة، بس يلا هو احنا يعني لاقيين، أي حاجة وننبسط.