الموقع الرسمي للأمم المتحدة أعلن عن اختيار اللاعب المصري محمد صلاح كأول سفير لشبكة التواصل المدرسي الفوري، ودي شبكة مدارس معمولة للطلاب اللاجئين، عشان تربطهم مع الدول اللي بتستضيفهم بتعليم رقمي كويس، خصوصًا وإن البرنامج هيتوسع في مصر للمرة الأولى.

وحسب اللي أعلنته الأمم المتحدة في بيانها، شبكة المدارس الفورية دي اتعملت في 2013، على إيد شركة من شركات الاتصالات العالمية وبالتعاون مع مفوضية الأمم المتحدة لشؤون اللاجئين، عشان يساعدوا اللاجئين والمجتمعات المستضيفة ليهم والمدرسين بتوعهم، في الوصول لمحتوى تعليمي رقمي وتحسين جودة التعليم.

البرنامج استفاد منه لغاية دلوقتي أكتر من 86 ألف طالب وأكتر من 1000 مدرس، وبيضم 36 مدرسة شبكة فورية، موجودة في مخيمات اللاجئين بكينيا وتنزانيا والكونغو وجنوب السودان. من ضمن مهام صلاح كسفير للبرنامج، إنه هيزور عدد من المدارس اللي بتدعمها الأمم المتحدة، عشان ينبه لأهمية التعليم الجيد لأطفال اللاجئين.

صلاح علق على اختياره وقال: "إنني أقيم شراكة مع أحد الشركات المتخصصة في الاتصالات ومفوضية الأمم المتحدة لشؤون اللاجئين لسد الفجوة بين التعليم المتاح للاجئين وأقرانهم الذين يعيشون في مجتمعات مستقرة". وأضاف نجم ليفربول الإنجليزي: "تعد مدارس التواصل الفوري مبادرة مهمة أفتخر بتمثيلها والتي توفر التعليم لجيل من الشباب في جميع أنحاء أفريقيا وقريبًا في بلدي مصر".