موجه مادة التربية الدينية في إدارة قفط التعليمية، محافظة قنا المصرية، اتحول للتحقيق بسبب سؤال في امتحان التربية الدينية للصف الثاني الإعدادي. السؤال كان اختر من بين الأقواس، عن مكان نزول سورة "الفرقان"، والاختيارات كانت (مكية - مدنية - مصرية). السؤال اتاخد سكرين شوت والناس قلبت الدنيا بسببه، واعتبروا إن اللي واضع الامتحان بيستهزأ بالقرآن.

محافظ قنا عبد الحميد الهجان، قال إنه كلف وكيل وزارة التعليم في المحافظة بالتحقيق مع الموجه، وكمان طلب المحافظ من وكيل الوزارة إنه يفتح قنوات اتصال مع الصحفيين علشان يرد استفساراتهم، بعد ما الصحفيين اشتكوا إن مافيش حد بيرد عليهم.