وزارة الصحة قفلت مستشفى "السلام الدولي" بالمعادي في القاهرة لمدة شهر، الإغلاق كان إداري تأديبي، عشان مانفذوش قرار مجلس الوزراء، باستقبال أي مريض بالطوارئ خلال ٤٨ ساعة وإنقاذ حياته، ومارضيوش يستقبلوا شخص مصاب إلا بعد ما كتبوه وصل أمانة بنص مليون جنيه. المريض جه المستشفى في حادثة عربية، وكان عنده بتر في إيده الشمال وكسور متعددة في إيديه والحوض.

القرار مش هيتطبق على كل وحدات المستشفى مراعاة للمرضى، فتم تشميع ٥ غرف عمليات بالدور التامن، غلق الحضانات بالكامل ومبنى العيادات الخارجية ماعدا الفسيولوجي العصبية لوجود جهاز رسم مخ فيها، وإغلاق العيادات في الدور الخامس ماعدا الدوبلكس والكيماوي وإغلاق قسم الطوارئ باسثناء الحالات الخطيرة اللي ماينفعش تتنقل مستشفى تانية.