الدراسة بدأت الأسبوع ده في مدرسة الضبعة النووية، وهي المدرسة الأولى من نوعها في مصر والعالم العربي وموجودة في مقر مدرسة تكنولوجيا الصيانة الفنية في مدينة نصر. بشكل أساسي هدف المدرسة هو إعداد جيل من الفنيين قادر يتعامل مع محطة الضبعة النووية اللي بيتم تجهيزها في مطروح.

الفكرة بدأت في عهد وزير التعليم الأسبق "محمود أبو النصر" سنة 2014، والمدرسة هتشتغل بنظام الخمس سنين، ونظامها داخلي. بدأ طلاب السنة دي الدراسة من مقر مدرسة تكنولوجيا الصيانة الفنية في مدينة نصر، لحد ما يخلَّصوا تجهيزات مدرسة مطروح قبل الفصل الدراسي التاني.

المدرسة اتقدم لها 1200 طالب، واتقبل منهم 75 بس، 30 طالب منهم من محافظة مطروح وبيمثلوا نسبة 40%، و45 من باقي المحافظات بنسبة 60%. تم اختيار الطلاب بعد ما مرّوا بمراحل متعددة، بدأت بامتحان قدرات متكون من مجموعة أسئلة في العلوم والرياضيات واللغات والذكاء، بعدها تم إضافة درجات الامتحان على درجات الطالب في الشهادة الإعدادية، وتم ترتيب الطلاب تنازليًا بشكل إلكتروني من غير أي تدخّل بشري.

 المدرسة فيها 4 أقسام، كهرباء، ميكانيكا، وإلكترونيات، والتخصص بيبدأ من سنة رابعة. هيدرس طلاب الصف الأول مواد عامة: فيزياء، كيمياء، رياضيات، لغة عربية وإنجليزية، بالإضافة لورش الميكانيكا، المدرسة ماتحددش مصاريفها لحد دلوقتي، فيها 22 مدرس اتدرَّبوا لمدة شهر في هيئة الطاقة النووية، وهيتم تدريب الطلاب كمان في نفس الهيئة وهيئة الطاقة الذرية كمان.