في الدقهلية، للسنة التانية، اتعملت مسابقة "العربجية" في منطقة فاضية، عشان يشوف أصحاب العربيات الكارو مين حصانه أقوى ويقدر يستحمل تعذيب وضرب أكتر.

حسب مراسل موقع "مصراوي"، اليوم بيبدأ بأصحاب أحصنة وعربيات نقل بتنقل الأحصنة وعربات كارو. كاوتش العربية الكارو بيكون مربوط بسلاسل حديد وحبال من كل النواحي عشان يعجِّزوا الحصان قدر الإمكان، وبيركب فوقها مجموعة من الأشخاص. هنا بيبدأ المتنافس يضرب حصانه ويعذبه، لاستثارته واستفزازه، عشان يكسر القيود ويجر العربية. أول ما الحصان بيدخل ساحة المنافسة، صاحبه بيقلع هدومه ويجيب كرباج وخرزانة، ويبدأ الضرب في مناطق مختلفة من جسم الحصان، وسط هتافات تشجيع من اللي بيتفرجوا.

من شروط المسابقة إن يتم إحضار عربة كارو للساحة، ويتم ربط الكاوتش بحبال أو سلاسل حديدية، وبعدها يتم ربط الحصان المشارك في العربة وتقييده بشكل كامل، بعدها يبدأ الحصان يتضرب عشان يجر 10 أطنان، واللي يقدر يجر يبقى هو الحصان الأقوى وصاحبه يكسب المسابقة. في المسابقة هتلاقي أحصنة بتعيط وبتنزف من كل جسمها، لكن ده مابيكونش كفاية عشان أصحابهم يوقفوا تعذيب.

الدكتور "إيهاب عباس"، صاحب مستشفى بيطري في مدينة المنصورة وصف اللي حصل النهاردة بإنه مهزلة، وأضاف لـ "مصراوي" إن الفترة الأخيرة شهدت تنظيم حلبات مصارعة للكلاب بنظام المراهنات، عن طريق إدخال كلاب على بعضها، وفي الأخر بيتم الإعلان عن الكلب الفائز في حال وفاة الآخر. وأشار لإنه بيسعى للتقدّم بمقترح قانون لمجلس النوّاب بشأن إقرار بعض مواد الرفق بالحيوان.

ونفى مصدر بحي غرب المنصورة، معرفته بالسباق اللي حصل وأشار لإن قطعة الأرض اللي حصل فيها المهرجان مش ملك الحي. وقال إنه المعروف إن العربجية بيتجمعوا كل سنة في المنطقة دي لركن عرباتهم اللي بييجوا بيها من كل ناحية، لكن موضوع المهرجان ده جديد على حد قوله.