إدارة مهرجان بوخاريست السينمائي الدولي، اختارت الفيلم المصري "يوم الدين" عشان يتعرض النهاردة 16 يونيه في ختام الدورة ال14 من المهرجان. الفيلم كان سبق وشارك في المسابقة الرسمية من مهرجان كان السنة دي وحصل على جائزة فرانسوا شاليه اللي بيقدمها المهرجان.

الفيلم بيتكلم عن بشاي اللي كان مريض بالجذام وتم علاجه لكن لسه آثار المرض ظاهرة على جسمه، وبيقرر بشاي لأول مرة يسيب مستعمرة مرضى الجذام اللي طول عمره عايش فيها، ويلف مصر عشان يكتشف أصوله وجذوره. الفيلم من بطولة راضي جمال و أحمد عبد الحفيظ و من تأليف و أخراج أبو بكر شوقي وإنتاج Desert Highway Pictures.