وزارة الثقافة هتعمل فرقة مسرح لذوي الاحتياجات الخاصة
"الشمس" هي فرقة مسرحية جديدة هتبدأ عروضها خلال الاسابيع اللي جاية. "الشمس" هتكون كل عروضها مقدمة لذوي الاحتياجات الخاصة و هيكون مسرح "الحديقة الدولية" هو مقرها الدائم. الفرقة مش بس هتقدم عروض بتعرض مشاكل و قضايا اصحاب الاحتياجات الخاصة لكنها هتعمل عروض بتجمع بين مملثين من البيت الفني للمسرح و ممثليين من اصحاب الاحتياجات الخاصة. مسرح "الحديقة الدولية" هيتزود بتجهيزات خاصة هتساعد اصحاب الاحتياجات الخاصة على متابعة العروض. هيكون هناك 30 كرسي متزود بسماعات للمكفوفين و شاشات خاصة بالصم متصلة بكاميرا مسلطة على مترجم بينقل كل اللي بيتقال على خشبة المسرح للمشاهدين.