يوستينا بنت من المنيا، ابتدت الموضوع بإنها انضمت للمسرح الكنسي وهي في اعدادي، بفضل تشجيع من أخواتها، وبعدين الموضوع اتطور بإنها أسست فريق اسمه "بنوراما برشا"، علي اسم القرية اللي هي منها. الفريق ده كان عبارة عن مسرح شارع بيعرض مشاكل البنات في الصعيد، ويوصل وجهة نظرهم للناس بطريقة بسيطة، واتعمل في الشارع عشان يوصل لكل الناس من غير ما حد يضطر يدفع تمن تذاكر.

المسرح تركيزه أكتر على المشاكل الاجتماعية، اللي منها العنف الجسدي، التحرش، الختان والزواج المبكر. يوستينا قالت ل"المصري اليوم"، إن من أقوى العروض اللي عملوها، عرض اسمه "الفرح"، عن الزواج المبكر، غنوا فيه أغاني تراثية ولبسوا لبس من بتاع زمان، وكان في ست بتسمع العرض وبدأت تتكلم عن فكرة إنها هتجوز بنتها بدري وابتدوا يتكلموا معاها وأقنعوها بفكرتهم.

يوستينا خرجت من "البرشا" ووصلت لمدن تانية ودول بره مصر، في الأول راحت القاهرة وكانت بتجيلها دعوات من حقوق الإنسان والمرأة، وبعدها سافرت التشيك عشان الصحة النسائية، وسافرت ألمانيا لتبادل الخبرات، وجاتلها دعوة من تونس وراحت الأردن كمان، واتعلمت ازاي البنات بتشتغل هناك وازاي الفن ممكن يأثر على المجتمع.

يوستينا كانت بتتعرض لمضايقات في الشارع وفي بنات كتير سابوا الفريق في الأول بسبب كده، بعدين الموضوع خف شوية والفريق بقى مختلط. دلوقتي بتحلم إنها تعمم بانوراما برشا على كتير من القرى وإن البنات تاخد فرص إنها تمسك مناصب قيادية.