الكاتبة سماح الحريري، مؤلفة مسلسل "الحقيقة والسراب"، بتنتهي دلوقتي من كتابة حلقات الجزء التاني من المسلسل وبعدها هيبدأ المخرج مجدي أبو عميرة في التصوير. "الحقيقة والسراب" اتذاع الجزء الأول منه سنة 2003 وحقق نجاح كبير، وكان من بطولة فيفي عبده وسمية الخشاب ومي عز الدين وأحمد زاهر. المؤلفة أكدت إن بداية التصوير هتكون بعد ما فريق العمل يخلص مسلسلات رمضان، وإن تفاعل الناس على السوشيال ميديا مع المسلسل رغم إنه اتعرض من 15 سنة، هو اللي شجعها تكتب جزء تاني

لغاية دلوقتي اللي وافقوا على المشاركة في الجزء التاني هما فيفي عبده وأحمد زاهر ومي عز الدين وخالد محمود، ولسه في مفاوضات مع سمية الخشاب وأحمد سعيد عبد الغني. سماح الحريري كانت صرحت لموقع "المصري اليوم" في أكتوبر 2017، إنها بتفكر في كتابة الجزء التاني من المسلسل واتواصلت مع المخرج مجدي أبو عميرة لكن لسه ماتكلمتش مع جهة الإنتاج ولا عرضت أدوار على الممثلين.

الجزء الجديد هيشهد غياب شخصيات شاركت في الجزء الأول زي يوسف شعبان اللي قرر يعتزل التمثيل، خيرية أحمد الله يرحمها ونهال عنبر وريهام عبد الغفور اللي مش هتكونلهم أدوار جديدة، لكن فيه شخصيات جديدة هتظهر زي جوز فيفي عبده ومرات أحمد زاهر، لكن لسه ماتمش الاستقرار على الممثلين اللي هيلعبوا الشخصيات دي.