مش بتاع أفراح بس.. 7 أغاني للعسيلي يشتغلوا في حفلات الطلاق
إيه التارجت بتاعك في حياتك؟ إيه اللي نفسك تحققه أو حلم لو وصلتله هتبقى قفلت الجيم؟ أظن بالنسبة لمحمود العسيلي التارجت بتاعه إن بعد 20 سنة يبقى الناس مابتشغلش أي حد غيره في الفرح. تدخل الفرح كده تقعد تلاقي كل الأغاني اللي بتشتغل بتاعت العسيلي بس، وهو مش مقصروعنده أغاني للفرح وللخطوبة ولقراية الفاتحة وليلة الحنة وهندخل عيالنا مدارس إيه وهنربيهم ازاي.. إلخ. وسط أغاني المناسبات دي، العسيلي له أغاني حلوة تنفع في حالات الفركشة والطلاق، هما مش كتير بس موجودين، وجايز بعد ما يخلص بلاي ليست أغاني الأفراح يدخل ع الفركشة والطلاق، خصوصًا إن نسب الطلاق بتزيد!
"مهما توصف ازاى بقيت وحيد ومهما زاد شوقك يا حبيبى ليه انسى خلاص أيامى ولياليه"، أغنية طلاق بامتياز، اللي هي تسمعها بعد ما تحاسب المأذون على طول. الأغنية قديمة من وقت بدايات العسيلي، ممكن حتى تحس إن صوته متغير فيها شوية أو أصغر.
لو حياتك العاطفية ماشية تمام يبقى هضطر أرشحلك من نفس الألبوم أغنية "تبات ونبات" المشهورة للعسيلي وبشرى، ودي بقى تسمعها وتسك ع الطلاق خالص وتقعدوا تختاروا أسامي الولاد.
"حكايتى معاك كنا أحباب اتحملنا فراق وعذاب وبعد طول غياب رجعنا بقينا سراب". أغنية من سنة 2006 من ألبوم "مين أنا" ودي أغنية أوفر ثينكينج، يعني بعد ما تفسخ أو تتطلق هتفضل بالليل يجيلك أوفر ثينكينج، ده المود بتاع الأغنية بقى. برضه حابب أقولك إن في نفس الألبوم في أغاني تحطها في بلاي ليست فرحك زي "الفستان الأبيض" و "تارا رام".
"فتح عينيه بعد مكانت مغمضه واد ايه كان ظالم نفسه فكل ده بس فيوم هيلاقى ست ستها وهتحبه أكتر مكان هوه بيحبها". الأغنية عن الخذلان والناس اللي وعدتك تكمل معاك وماكملتش، اسمعها بعد طلاق أو فركشة وأقعد افتكر كل المواقف اللي قدمت فيها حاجات ومأخدتش غير خذلان وإن شاء الله هتحس إن العسيلي جنبك وحاسس بيك ومر بالكلام ده قبل كده.
الأغنية من ألبوم "طول ما أنتي جنبي" إنتاج 2009. من نفس الألبوم ممكن ترقص وتحتفل على أغاني زي "طول ما انتي جنبي" أو ترقص سلو على "بيتي ومطرحي".
"وكنت بحس لو سابتني انا بعد منها هموت واديني بعيش على كل حال مين اللي قال بكرة ما بينسيش". الأغنية من ألبوم "دنيا جديدة" سنة 2012، ومناسبة جدًا لفترة بعد الفركشة اللي بتقعد تقول لنفسك فيها أنا كويس أنا تمام وهعيش من غيرها عادي، بس مابتبقاش كويس ولا تمام، بس الجود نيوز إنك هتعيش من غيرها عادي متقلقش. لو عندك فرح أو حنة، ممكن من نفس الألبوم تسمع "دنيا جديدة" و "ست الستات" و "عايشين".
"يا ازاز مكسور وسنين انا ماشي عليه يا جرح تعبت اداريه انا بعمل كل ده ليه ويا قصر الوهم الملعون بالحزن وبالخوف مسكون هخرج للناس من بعد سنين عشتها مسجون". أغنية سينجل من كلمات أمير طعيمة وألحان العسيلي نفسه ومناسبة جدًا للحظة اللي هتاخد فيها قرار الطلاق، اللي هي لحظة الانفجار والتنفيس عن كل حاجة أنت استحملتها والمعايرة والشتيمة وكل ده، بس ياريت بعد ما تعمل كل الحاجات دي ماتكونش ماضي على قايمة كبيرة، لو في قايمة ومؤخر وكده.
"أوعي تاخدي كلام هزار لا الرجوع مش بزرار أنتي فأكرة نفسك أيه لا لا فوقي". أغنية سينجل برضه وبتنفع لما يبقى حد بيتدخل عشان يصالح بينك وبين الجماعة، بس أنت مقرر إنه مش هينفع فتبدأ تردح، أو مثلا لما تقابلها في مناسبة عائلية وتقولك وحشتني فأنت أصلا كنت مستني الفرصة دي عشان تنتقم منها وتكسرها، فتقول كل اللي أنت كنت محوشه زمان بقى.
"خاينة نسيت اللي قولنا أنا وأنتي عليه قولنا هنبعد وننسى بترجعي ليه ده احنا حاولنا وفشلنا وقولنا خلاص راجعة نعيد اللي فات على اي اساس". الدويتو اللي عمله العسيلي مع محمود الليثي ينفع في المناسبات الحزينة، رغم إن المزيكا مش حزينة خالص، دي أغنية لحالات التلبس، قفشتها مع واحد غيرك وبعد فترة رجعت تقولك نرجع ونتصالح تقوم أنت فاضحها ومشردها بقى.
