بحب أبدأ كلامي دايمًا بشكل خفيف ساخر، عشان أخفف الحمل على الناس اللي بتقرأ، لكن المرة دي عايز أبدأ  بسؤال: هو ليه في فرق بتغني حلو بالمقاييس العادية الفنية الطبيعية جدًا، تظهر وبعد كده تختفي مع مرور الوقت؟ والوقت ده ممكن يكون سنة أو أكتر. ده بسبب إيه؟ هل بسبب نوع المزيكا اللي بيتقدم  ولا بسبب إن مافيش استمرارية؟ احنا ممكن نعرف، أو خلينا نقول نحاول نعرف، الرد على السؤال واحنا بنسمع 10 فرق من إسكندرية، في منهم اللي مستمر ومنهم الجديد ومنهم القديم ومنهم اللي اختفى أو اللي مش معروف.

هجين - حروب

عدد الفرق اللي بتعمل ريجي عربي (الريجي في أبسط أشكاله المعروفة زي بوب مارلي مثلا) مش منتشر في مصر، هما 3 فرق مثلا  وواضح إن المستمع المصري مش معترف بالنوع ده من المزيكا، عشان كده مش بيشجع الفرق دي إنها تظهر، فيكون مصيرها الزوال في خلال فترة زمنية قصيرة، بالنسبة لعمر الفرق التانية اللي بتقدم روك عربي زي "مسار إجباري" مثلًا، وإن مصر مش مكان للريجي العربي من وجهة نظرهم اللي بعتبرها غلط طبعًا.

صفصافة - ست البنات

مش شايف إن الريجي العربي اللي بتقدمه صفصافة ممكن يكون مشكلة لو المزيكا حلوة وتتسمع من غير ما تكلف نفسك، بمعنى إنك تحاول تفسر إيه اللي بيحصل في الخلفية وليه بيعملوا كده، برضه فكرة إن في ناس لا تنتمي للمزيكا دي بالمفهوم الثقافي وكده، بس قشطة لو سمعها من حد تاني بالإنجليزي مثلا أو اتفرج في حفلة.

هاي دام - أنا نوبي

في أغاني موجهة لناس تنتمي لثقافة معينة، مثلا زي المزيكا النوبي اللي بتلعبها فرقة "هاي دام"، دي بتعتبر أغاني ذات نطاق سمعي ضيق, بس ده مش معناه إن الناس عشان بتعمل مزيكا مرتبطة بثقافة وتراث معين، إنها يبطلوا عشان محدش عايز يسمع المزيكا دي، لا طبعًا، الموضوع مش بيتقاس كده، طالما المزيكا حلوة يبقى هسمعها.

المينا - صحاب

في أغاني بتكون سهلة على ودان الناس زي اغنية صحاب لفريق المينا، عشان هما عملين خلطة موسيقية ما بين الريجي على شوية من روح البلوز وقلبوها بالجيتارات في صوتها البسيط المألوف للمستمع العادي، يعني معمولة بشكل خفيف ومش مرهقة سمعيًا، وطبعًا مين فينا مش بيحب صوت الجيتار الأكوستيك، فده نوع من الأغاني اللي سهل إنه ينتشر ما بين الناس.

سحرالزغبي ( بكفي عاد)

سحر عاملة أغنيتين وهي لسه بتقول يا هادي والاتنين Cover بس حلوين جدًا، أصل موضوع الكافرز ده ممتع، مشكلته إن فيه مقارنات وأنا فاهم وملتمس العذر في موضوع المقارنات، بس ده ما يديش الحق إن الناس تحكم على الفرقة فنيًا بسبب إن الكافرز مش حلو زي الأغنية الأصلية. لأ طبعًا بس ممكن Cover اتعمل غلط أو اتعمل بشكل مختلف زي أغنية ne me quitte pas اللي طوب الأرض عملها، من أول داليدا لحد مشروع ليلى، بس أنهي أحلى فيهم بقى.

ستورم باند - هتجنن

لو الCover طلع على عكس توقعات المستمع، هنا بقى الفرقة هتقع في مشكلة إنها ممكن تفقد ثقة المستمع وماتقدرش تجذبه تاني لتجربة من النوع ده. ستورم باند ناقصهم عنصر روح الأغنية الأصلية، السبب إن هما عايزين يحطوا اللمسة بتاعتهم فيها ومافيش مشكلة، بس اعملها بشكل يناسب الموضوع، يعني في نوستالجيا وفي آلات موسيقية وأداء وتمثيل صوتي من المغني، كل ده لازم يتحط في المعادلة.

كراكيب - اخطفيني



الفرقة بتعمل روك عربي، بس بروح البوب المصري، وده سهل إنه يتسمع لو هتقارن بالأنواع التانية زي النوبي والريجي والبلوز على سبيل المثال. ليه بقى مافيش استمرارية؟ طب يبقى كده المشكلة خرجت من نوع المزيكا نفسه ودخلت في الفرقة نفسها، يعني مش عارفة تستمر أو إنتاجها مش كتير فالمستمع بيزهق من التجارب الموسيقية الموجودة وعايز حاجه تشده. ممكن تكون الفرقة ماعندهاش نظرة لقدام وإن الموضوع بالنسبالهم مرحلة مؤقتة و خلاص!

شوارعنا - نفسياً

يعني  ينفع تعمل ألبوم واحد في 5 سنين أو تعمل كام أغنية في 5 سنين؟ في ناس مع إن الفرقة تاخد وقتها وتنتج ألبوم قوي في فترة زمنية كبيرة من 3 لـ 4 سنين، ولكن في أسباب تانية، زي ظروف الحياة والكسل ومشاكل داخل الفرقة، أو إن كل موسيقي في الفريق بيبقى مشغول بنفسه و بيروح يلعب مع فرق تانية، أو إنهم معتمدين على شكل موسيقي واحد، زي البوم فريق شوارعنا اللي روح البوب المصري واضحة فيه. فعشان كده ممكن يكون ممل أو ما سمعش زي ما هما متوقعين، ما هو الفرقة المستقلة المفروض تديني كمستمع حاجة مختلفة عن الشائع.

أقصى الوسط - اشربيني

فريق زي أقصى الوسط، أصلا الاسم يشد فضولي إني اتعرف على المزيكا اللي بيلعبوها، ومش مهم إنه يكون في تصنيف موسيقي يختلف عليه الفقهاء والعلماء، عشان المهم إن في مزيكا حلوة بتتلعب وفي كلام مكتوب بشكل مختلف غير نمطي، وكل واحد يقيسه بطريقته بعيد عن قصد الفرقة.

طب ليه مش بنسمع عن الفرق دي ليه مش بنشوفهم في حفلات زي كايروكي و شارموفرز و زاب ثروت (الغضب حماقة يا حورية)؟ طب لو المشكلة مش في النوع ولا في الاستمرارية، يبقى المشكلة في المستمع مثلا؟ ولا إن الفرق دي مش عارفة تسوق لنفسها؟احنا عايزين فرقة عمرها من عمر السلحفاة يا أخوانا وإنتاجها زي الكثافة السكانية في مصر والجودة الفنية زي القطن المصري.

هل ده مصير المزيكا في إسكندرية؟ غير كده بقى احنا عايزين نسمع الفرقة العاشرة منكم انتوا، من اختياركم وأولًا وأخيرًا أنا فاهم إن الأنواع دي جمهورها مش كبير، بس ده مش مانع برضه ما الفرق التانية بدأت كده يعني

آخر فرقة من اختياركم أنتوا