"نسيت السماعات في البيت!" حاجة من أوحش الحاجات اللي ممكن تحصلك في بداية يومك. المزيكا مهمة، المزيكا بتخليك تفصل، ده اللي بيخلي نص الناس اللي بتشوفها في يومك، حاطة سماعات في ودانها، ده اللي بيخلي المشهد الموسيقي في مصر كل يوم يكبر ويتطور، ده اللي بيخلي حفلات المزيكا تكتر وعدد حضورها يكتر أكتر وأكتر، خصوصًا من الشباب. "ريد بُل" و "دماغ تانية في حتة تانية" عارفين الكلام ده كويس.

"ريد بُل" و "دماغ تانية في حتة تانية" من أهم الكيانات اللي بتنظم فعاليات تهم الشباب في مصر، والاتنين بيدوروا حوالين الشباب واهتمامتهم، طبعًا الموسيقى دايمًا على راس أولوياتهم. ده اللي شوفناه بشكل واضح من كام يوم في حفلة "ريد بُل ساوند كلاش"، اللي بتنظمها "ريد بُل"، والسنة دي الإيفنت كان بالشراكة مع "دماغ تانية في حتة تانية". مش دي الحاجة المميزة الوحيدة في ساوند كلاش 2019، لإن السنة دي كانت أول مرة يتعمل فيها الساوند كلاش على مدار 3 أيام وشارك فيه 6 فرق، وفي كل يوم من الأيام التلاتة، "دماغ تانية" كانوا حاضرين.

في اليوم الأول كان الكلاش ما بين فريقين من الأردن، هما "آخر زفير" و "أوتوستراد" وعلى مدار 4 جولات بيقدم فيها كل فريق أغانيه وكمان أغاني الفريق المنافس، الجمهور هو اللي بيحكم ويقرر مين منهم الكسبان. اليوم التاني كانت منافسة شديدة ما بين "وسط البلد" و "جدل" بنفس القواعد، والختام كان مع "شارموفرز" و "عزيز مرقة". وجبة دسمة من موسيقى الأندرجراوند استمرت ل 3 أيام في مول مصر، واستمتع بيها أكتر من 20 ألف شخص. كمان شارك في الحفلات كضيوف نجوم مهمين زي حميد الشاعري وهشام عباس ومحمود الليثي ورامي صبري وأبو الليف وغيرهم.