لو كتبت في جوجل "محافظات بلا سينما" هيطلعلك نتايج زي "كيف أصبحت محافظة أسيوط بلا سينما؟"، "أهالي المنوفية يذهبون لشبين الكوم لمشاهدة الأفلام في دور العرض"، "الصعيد خارج نطاق السينما" وأخبار ومقالات كتير عن عدم وجود السينما في أغلب محافظات مصر سواء في الوجه البحري أو القبلي، مقالات اتكلمت عن مدن ومحافظات عمرها ما دخلها سينما ومحافظات كان فيها أكتر من سينما واتقفلت أو اتحولت لمشاريع تانية.. زمان حد قال "فن السينما للجمهور"، من حق الجمهور إنه يشوف سينما ويتأثر بيها ويكتشف بيها حاجات جديدة ووعيه يزيد، في المقابل مش مطلوب منه يخبط مشاوير طويلة عشان يشوف فيلم. 
أغلب محافظات مصر بتعاني من عدم وجود دور عرض سينمائية واغلبها مكتفي بنادي السينما اللي بيحصل كل فترة في قصور الثقافة بالمحافظات.

من هنا ظهر الدافع اللي خلَّى المركز المصري للدراسات والأبحاث الإستراتيجية وهو مؤسسة أهلية مصرية مستقلة غير ربحية، بيسعى لإنه يكون أكبر مركز للبحوث الاستراتيجية في الشرق الأوسط وتركيزه الأساسي على إجراء البحوث اللي هتفيد المجتمع المحلي المصري، يعلن عن إطلاق مشروع "سيما مصر" اللي هيغير مفهوم السينما في مصر، من خلال إنشاء 55 دار عرض سينمائية بتخدم 36 مليون مواطن مصري في 50 مدينة بـ 27 محافظة مصرية، وإنتاج من 8 لـ 10 أفلام سينمائية بمعايير مختلفة تخاطب كل فئات المجتمع.

مشروع "سيما مصر" يعتبر الأول من نوعه في مصر والشرق الأوسط، اللي بيسعى لتوفير أكبر سلسلة من مساحات عرض سينمائية في كل المحافظات بحيث مايقتصرش تواجد السينما في محافظات القاهرة والجيزة واسكندرية، كمان من أهداف المشروع إنه ينشر ثقافة السينما في المحافظات اللي مافيهاش دور عرض سينمائية ويزوّد الوعي الثقافي والفني في المجتمع.

فكرة المشروع اتبناها المركز بعد أبحاث عملوها واستنتجوا إن حوالي 250 دار عرض تم إغلاقها في أخر 10 سنين وده سبّب نقص كبير في الموارد الثقافية والفنية في مصر، فكان الدافع لإطلاق المشروع الجديد هو خدمة كل فئات وشرائح المجتمع، وده هيتحقق لما الفرد يكون في مقدوره تحمل تذكرة السينما اللي هتكون بـ 10 جنيه، والقدرة الاستيعابية لكل دار عرض في "سيما مصر" حوالي 345 شخص منهم 24 مكان مخصص للأشخاص ذوي القدرات الخاصة.
الجمهور اللي بيستهدفه المشروع من عمر 15 لـ 45 سنة، وبيمثلوا حوالي 10% من السكان في كل محافظة محتاجين وسيلة ترفيه يقدروا يتحملوا تكلفتها المادية.

متوقع إن الافتتاح الكبير للـ 55 دار عرض السينمائية هيكون في يناير ٢٠٢٠.

ومش بس دور إنشاء دور عرض سينمائية في كل المحافظات، لكن كمان المركز المصري للدراسات والأبحاث الإستراتيجية هيدعم المواهب المصرية عن طريق تزويدهم بمنصة جديدة تتبنى مشاريعهم السينمائية وتطورها، وبيئة جديدة تسمحلهم باكتشاف مواهبهم الفنية سواء في الكتابة أو السيناريو أو التمثيل أو التصوير أو الإخراج، للسبب ده تم تشكيل لجنة فنية تحت إشراف المخرج المصري هادي الباجوري لاختيار الأفلام والإشراف على إنتاج الأفضل منها.