لحد دلوقتي أطفال كتير في مصر لسه بيعانوا من حرمان في التعليم بسبب وجودهم في مناطق بعيدة ومحرومة من وصول الأطفال فيها للتعليم الابتدائي الحكومي، سواء بسبب عدم وجود مدارس قريبة ليهم أو عدم وجود قدرة استيعابية في المدارس ليهم، بجانب المشاكل الاقتصادية والاجتماعية اللي بتصعب عليهم حقهم في التعليم.
ده كان الدافع اللي خلى إدارة التعليم المجتمعي بمؤسسة مصر الخير تشتغل على تطوير المدارس المجتمعية في كل محافظات مصر وبتستهدف الأطفال المتسربين والمحرومين من التعليم، بيساعدها في تحقيق ده مجموعة من الشركات وجهات خارجية عشان يمكنوا المجتمع المحلي من إدارة المدارس المجتمعية.

"مصر الخير" مع شركائها بدأوا مشروع دعم التعليم المجتمع اللي بيهدف لتوفير فرص تعليمية عالية الجودة للأطفال المتسربين من سن ٦ لـ ١٤ سنة، واللي اتحرموا من التعليم بسبب سن التعليم الإلزامي وتمكين المجتمع المحلي من إدارة المؤسسات التعليمية في محافظات مصر زي: مطروح، كفر الشيخ، الفيوم، بني سويف، المنيا، أسيوط، سوهاج، قنا، الأقصر، وأسوان.

المدارس المجتمعية من المشروعات الأساسية في مؤسسة "مصر الخير" واللي بتساهم في تغيير حياة أطفال وأسر كتير في مصر، وفي صعيد مصر تحديدًا. مشروع المدارس المجتمعية واللي بنعتبره من أهم مشروعات قطاع التعليم في مؤسسة مصر الخير.

المدارس المجتمعية هي فكرة جديدة وعملية بتساهم في تعليم الأطفال في الصعيد بشكل سهل وبيقرّب لهم المسافات وبيتيح لهم الفرص يلاقوا التعليم اللي نفسهم فيه، وبيساعد كمان في القضاء على ظاهرة الأطفال المتسربين من التعليم، والأطفال اللي بيشتغلوا مع أهلهم أو بتضطرهم الظروف لكده.. فبييجي دور المدارس المجتمعية بإنها تساعدهم يرجعوا تاني يكملوا تعليمهم.

الطلاب في المدارس المجتمعية بيتعلموا نفس مناهج التعليم الأساسية، وكمان بيقدروا يخلصوا السنة الدراسية في وقت أقل لو مستوى الطالب أو وقته وظروفه بتسمح. الطلاب في العادي في كتير من محافظات وقرى الصعيد مش بيلاقوا مدارس قريبة منهم، وده بيصعّب المشوار عليهم أو ممكن يحرمهم تمامًا من التعليم خاصةً لو بنات.. فأهلهم بيخافوا عليهم من مخاطر الطريق وطول المشوار.

فالمدارس المجتمعية بتوفرلهم مكان سهل وقريب من البيت.. وبتوفر بيئة مناسبة للتعليم، وكمان طريقة التعليم نفسها مختلفة في فصل مدرسة التعليم المجتمعي، وبيتم تدريب المدرسين بحيث يكونوا مؤهلين للتعامل مع الأطفال وتربيتهم بشكل سليم قبل تعليمهم.. فالطالب بيقدر يشارك بنفسه ويتعلم مهارات مختلفة وهوه بيتعلم المنهج في نفس الوقت وبياخد الشهادة الي بتؤهله للمرحلة الجاية من التعليم.

بجانب توفير فرص تعليمية للأطفال المحرومين من التعليم، مشروع دعم التعليم المجتمعي اللي مؤسسة مصر الخير مهتمة بيه بشكل أساسي لُه اهداف تانية زي تحسين جودة التعليم في مدارس التعليم المجتمعي من خلال تقديم برامج التنمية المهنية لبناء قدرات الميسرين والميسرات.

كمان من الأهداف تفعيل دور المشاركة المجتمعية في العملية التعليمية من خلال الشراكة مع جمعيات المجتمع المحلي ولجان التعليم في مناطق مدارس التعليم المجتمعي.

لحد دلوقتي فيه ١٠٠٨ مدرسة مجتمعية في مصر، منهم ٣٨٨ مدرسة مجتمعية انشأتها مؤسسة "مصر الخير" أو طورت مبانيها، المدارس دي بتضم أكتر من ٣٠ ألف طفل وطفلة، وأكتر من ٥٠٠ لجنة تعليم وأكتر من ٢٠٤٠ مُدرس ومُدرسة.. كل دول قدروا يستفيدوا من حملة "مصر الخير" في دعم التعليم في المدارس المجتمعية في مصر.

مجموعة كبيرة من الشركاء دعموا مؤسسة "مصر الخير" في حملتها. الشركاء دول هما: نادي روتاري، د/ عمرو بركات، مبادرة تكاتف، وقف العهد الخالد، مؤسسة بحرين ترست، قطن الكندية، بنك كريدي أجريكول، بنك تنمية الصادرات، شركة مصر المقاصة، شركة أورانج، مصرف ابو ظبى الاسلامى