الأوليمبياد هي أعظم حدث رياضي في التاريخ. أي رياضي بيحلم إنه يقف على المنصة الأوليمبية، يستلم ميداليته ويسمع نشيد بلده بيتعزف ويشوف علمها بيترفع لفوق. بالنسبالنا كمصريين، الأوليمبياد هي حدث بيتكرر كل 4 سنين وبيخلينا نتعرف على أبطال الألعاب الفردية، ونشجع لاعيبة الجودو ورفع الأثقال والملاكمة والمصارعة.. إلخ. في الأوليمبياد كانت لينا لحظات حلوة ماتتنسيش، زي لحظة فوز كرم جابر بميدالية أثينا 2004 أو لحظات فوز محمد إيهاب وسارة سمير وهداية ملاك في ريو 2016، طب واللي يساعدك تشوف اللحظات دي من تاني؟ شركة إنرشيا للتطوير العقاري هتعمل ده.

"إنرشيا" أعلنت عن برنامجها الجديد لدعم وتأهيل الأبطال المصريين، عشان يحققوا ميداليات ذهبية في أوليمبياد طوكيو 2020، وأوليمبياد الشباب 2022. "إنرشيا" هيدعموا 3 أبطال، وهم بطل الجودو رمضان درويش وبطل المصارعة الرومانية حسن حسن، واللي هيشاركوا في منافسات طوكيو 2020، وكمان هيدعموا لاعبة التنس الشابة ليلى شكري، عشان تخوض أوليمبياد الشباب في 2022.

أحمد العدوي، المدير التنفيذي للشركة، قال: "إننا مؤمنين بصعوبة التحديات اللي بتواجه المجتمع في صناعة أبطال رياضيين يحققوا إنجازات عظيمة، عشان كده جه الوقت اللي الأبطال الرياضيين يحصلوا فيه على رعاية ودعم لائق من شركتنا". وعن تفاصيل البرنامج الرياضي للشركة، أوضح "العدوي" إن البرنامج بيوفر دعم مادي ومعنوي للأبطال، وبيوفرلهم تدريبات وتجهيزات فنية وبدنية، تساعدهم ف مشوارهم الأوليمبي.

"إنرشيا" هي شركة مصرية ليها مشروعات كبيرة في قطاع العقارات، من وقت بدايتها في 2007، وساهمت في بناء مجتمعات سكنية كبيرة زي West Hills ،Veranda ،G-Cribs ،Soleya ،Brix ،Joulz،  و Jefaira  ومشاريع تجارية طبية زي Medipoint Sheikh Zayed و Medipoint Mena Plaza. في نفس الوقت الشركة مؤمنة إن دعم الأبطال الرياضيين هو جزء من دورها ومسؤوليتها الاجتماعية، وده كان سبب في إعلانهم عن برنامج رياضي، وسبب كمان إن مؤسسي الشركة سجلوا بنفسهم التعليق الصوتي للإعلانات التلفزيونية اللي بتدعم الأبطال الرياضيين دول.

الأبطال التلاتة اللي اختارتهم الشركة، مش أغراب خالص عن منصات التتويج؛ رمضان درويش سبق وكسر الرقم القياسي الدولي في رياضة الجودو، وقدر يحقق ذهبية دورة ألعاب البحر المتوسط 3 مرات متتالية، وذهبية بطولة إفريقيا 6 مرات، والمركز السابع في أوليمبياد ريو دي جانيرو 2016. أما بطل المصارعة الرومانية حسن حسن، فهو سبق وفاز بفضية بطولة العالم للشباب في سبتمبر 2018 بسلوفاكيا، بالإضافة لذهبية بطولة إفريقيا. أصغر الأبطال سنًا هي لاعبة التنس ليلى شكري صاحبة ال12 سنة، واللي بتشتغل عشان تكون جاهزة لتمثيل مصر في بطولة رولان جاروس 2021 وأوليمبياد الشباب 2022.