"#بحث_جاري".. مشاهير السوشيال ميديا بيدوروا على إيه؟
فيه حاجات بتضيع منك ومابتعرفش تلاقيها وهنعرف مكانها في الجنة كده إن شاء الله، زي فردة الشراب اللي بتختفي في الغسالة ومابنعرفش طريقها، والميدالية اللي بتتوه في الشنطة ومابتعرفش توصلها وأنت تايه، وسماعات الموبايل اللي ممكن تخليك تقضي اليوم كله وأنت زهقان ومش عارف تعمل إيه، ودايمًا لما تضيع منك حاجة تفتكر كلمة والدتك المشهورة "ولو جيت ولقيتهالك" ويبقى نفسك تيجي وتلاقي كل حاجة في حياتك، الأيام الحلوة وسنين عمرك اللي راحت والعشرة الطيبة والصحاب اللي مابقوش موجودين، بس للأسف مامتك مش هتعرف تلاقي كل ده.
واحنا بندور على كل ده ومش عارفين نلاقي حاجات كتير، لاقينا مشاهير منزلين صور بهاشتاج #البحث_جاري، وبيدوروا على حاجة مجهولة ماحدش عارف هي إيه؟ حاولنا نوصل ونعرف بيدوروا على إيه بس ماوصلناش لحاجة، لكن قررنا ندور معاهم وصممنا نوصل للي بيدوروا عليه، عشان واضح إن الموضوع كبير.
لو أنتم عرفتوا البحث جاري عن إيه قولولنا وشاركونا عشان نعرف البحث عن إيه؟
