مصر رايحة كاس العالم، 28 سنة من الانتظار للحظة دي! كاس العالم خلاص على الأبواب وهيبدأ في شهر 6 الجاي، اللاعيبة بتستعد وبرضه الجمهور بيستعد، محمد نوفل المعروف باسم الرحالة المصري "ابن نوفل"، قرر يسافر من مصر لروسيا على عجلته، عشان يشجع مصر في كاس العالم. ابن نوفل سبق وسافر الجابون بالعجلة عشان يشجع المنتخب في بطولة أمم افريقيا اللي الجابون نظمتها في يناير 2017.

"نوفل" قال لـ"مصراوي" إن رحلته هتكون 5 آلاف كيلو متر وهتاخد منه 90 يوم، هيبدأ التحرك من عند أهرامات الجيزة يوم 7 أبريل الجاي، ومنها للأردن، العراق، تركيا وبعدين شرق أوروبا ويعدي ببلغاريا، أوكرانيا، رومانيا، مولدوفا، ويوصل روسيا يوم 7 يونيو. "نوفل" بيقول إن من الصعوبات اللي هيواجهها هي اللغة، لإن سكان المناطق اللي هيمر عليها مش بيتكلموا انجلش وهيبقى مضطر يتكلم بلغتهم أو يتكلم بلغة الإشارة.

"نوفل" بيجهز نفسه للرحلة عن طريق التدريب وتحديد خط سيره والإسعافات الأولية.