#بحث_جاري.. أخيرًا عرفنا الناس بتدور على إيه
من أول مارس ما بدأ، كان ممكن تشوف بوستات وصور على السوشيال ميديا لناس مشاهير، بيستخدموا فيها هاشتاج #بحث_جاري من غير ما يقولولك هما بيدوروا على إيه بالظبط؟ حاولنا المرة اللي فاتت نتخيل إيه اللي ممكن يكون ضايع وبنبحث عنه، لاقينا حاجات كتير زي سماعة الموبايل أو فردة شراب أو أجدع جيران وأصحاب زمان، وكلهم مش هتلاقيهم عادي، بس في الآخر اكتشفنا إن الهاشتاج بيدور على حاجة تانية خالص.
بطل القصة هي مؤسسة "مصر الخير"، والحكاية كلها عن البحث العلمي والابتكار، لإن المؤسسات غير الحكومية دورها مش لازم يكون متوقف على الإعانات وجمع التبرعات. المؤسسة عملت الحملة دي كلها بالتعاون مع ناس كتير، علشان يروجوا للبحث العلمي اللي بيدعموه من سنة 2008، ودعموا لغاية دلوقتي 29 مشروع. ليه ممكن مؤسسة خيرية تدخل مجال البحث العلمي؟ وإيه الأبحاث اللي هيشتغلوا عليها؟ إجابة السؤال الأول قالها شريف نور الدين في الفيديو، عشان كل حاجة في حياتنا وكل مشكلة بنقع فيها محتاجة بحث، والبحث هو اللي هيوصلنا لكل الحلول.
"مصر الخير" بيحاولوا من خلال الابتكار يوصلوا لحلول مشكلات زي الصحة والمياه، التعليم والطاقة والمواد الغذائية والزراعة، فلو أنت باحث أو شركة، المؤسسة جاهزة إنها تمولك 3 دورات احتضان وبإجمالي 20 شركة، يعني من أول ما تجيب الفكرة، لغاية ما تحولها لمنتج فعلي أو خدمة حقيقية موجودة وبيستفيد بيها الناس. هوضحلك أكتر، عندك مثلا مشكلة زي المياه في القرى، في أكتر من 3000 قرية بيعانوا من مشكلة تلوث مياه الشرب ومافيش عندهم صرف صحي، الهدف هنا هو استخدام الابتكار عشان نوصل لحل يعالج المياه ونطبقه على قرية من القرى، نتأكد من نجاحه ونبدأ في تعميمه.
مشكلة تانية "مصر الخير" شغالين عليها هي مشكلة التقزم، وده بيكون ناتج عن سوء التغذية ومافيش منه علاج، لكن بالبحث العلمي ممكن نوصل لشكل غذائي بيحمي الأطفال من سن سنتين لخمس سنين من سوء التغذية وتقوية مناعتهم، وهيطبق البحث في البداية على أطفال محافظة القليوبية، اللي فيها من 60 ل 65% من نسبة التقزم. دي نماذج لمشروعات بحث علمي هتكون سبب في حل مشاكل كتير. "مصر الخير" رؤيتها إن كل التحديات والمشاكل المجتمعية اللي بتعاني منها الطبقات الفقيرة، ممكن تتحل عن طريق الابتكار وريادة الأعمال والمشروعات والأبحاث الجديدة.
