من وقت للتاني ومن زمان مش دلوقتي، بتلاقي هوليوود والدراما العالمية عموما، ممكن تحدف علينا فيلم بيحكي عن شخصية عربية أو بتدور أحداثه في دولة عربية، وعادة الأعمال دي بتستلم الشخصية العربية تريقة وبتطلع بصورة نمطية تنقسم لحاجتين: إما البلد العربية دي بسكانها لسه عايشين في أيام الجاهلية وسط الخيم والجمال، أو إن العرب دول بيكونوا شخصيات فاحشة الثراء غرقانة في الخمر ومتحاوطة بالنساء، لكن من وقت للتاني برضه بتظهر "فلتات" بتكون صورة العرب فيها منصفة شوية، أو بتكون الأحداث مالهاش علاقة بشخصيات عربية لكن الأحداث بتدور في بلاد عربية وبينقلوا من خلالها صورة معقولة أقرب إلى الواقع عن البلاد دي، في الليست دي هنقولك على شوية أفلام ومسلسلات بتحصل أحداثها في بلاد عربية وهتتبسط لما تشوفها

The Night Manger  - 2016

مسلسل مقتبس من رواية بتفس الاسم للكاتب ‎John le Carré وصدرت سنة 1993، بتحكي قصته عن "جوناثان باين" اللي كان جندي سابق في الجيش البريطاني وبعد كده بيشتغل مدير ليلي في فندق فخم في القاهرة، ومع حاجات كتيرة بتحصل، بتقع في إيده وثائق سرية لتجارة غير قانونية في الأسلحة وفي ليلة بيقابل "صوفي"، وهي ست عربية فرنسية عشيقة صاحب الفندق "فريدي حميد" اللي له علاقات مع "ريتشارد أونسلو" صاحب تجارة الأسلحة، فبينتهي الأمر بتورط "جوناثان" في التجارة.

المسلسل بطولة: -Tom Hiddleston-  Elizabeth Debicki- Hugh Laurie

Green Zone –2010

الزمان: مارس 2003، والمكان المنطقة الخضراء في وسط بغداد، بيعود الفيلم للأيام الأولى للحرب في العراق، ضابط التفتيش "روي ميللر" وهو جندي في الجيش الأمريكي، بيتكلف هو وفريقه بالعثور على أسلحة الدمار الشامل اللي بيعتقدوا إنها مخزنة في مناطق مختلفة من المدن العراقية، ومع تطور الأحداث بيكتشف "ميللر" إن المهمة اللي سافر العراق عشانها ما هي إلا مهمة وهمية بررت بيها أمريكا احتلالها للعراق والقصة بتتكلم عن فضح مصالح بين أطراف عراقية وأطراف أمريكية.

الفيلم اتصورت مشاهده بين المغرب وإسبانيا من بطولة Matt Damon- Damon Greg Kinnear  - Brendan Gleeson.

tryant - 2014

بيحكي المسلسل عن "بسام الفايد" دكتور الأطفال، اللي عايش في لوس أنجلوس وابن ديكتاتور من إحدى بلاد الشرق الأوسط، وفي زيارة لبلده الأصلي مع عيلته بعد 20 سنة غياب عشان يحضر فرح ابن أخوه، بيموت أبوه فجأة وبيلاقي نفسه متورط هو وعيلته في إضطرابات سياسية مختلفة حاول طول عمره يبعد عنها بإنه يهرب ويعيش في أمريكا. الأحداث بتدور في بلد عربية خرافية اسمها "أبودين" لكن هتسمع أثناء الحوار في المسلسل إنهم في مكان ما قرب الحدود الكويتية، واتصورت الأحداث كلها في المغرب.

المسلسل من بطولة:

Gwyneth Horder-Payton Michael Lehmann Peter -Weller Alex Zakrzewski

Munich -2005

الفيلم اللي اترشح لخمس جوائز أوسكار من إخراج "ستيفن سبيلبيرغ"، بيحاول من خلاله يجسد الصراع العربي الإسرائيلي، بيتكلم عن عمليّات ملاحقة واغتيال لبعض قادة منظمة التحرير الفلسطينية خلال السبعينيات في بعض المدن الأوروبية وتحديدا في بيروت، على إيد فرقة خاصة جهّزها الموساد الإسرائيلي، بناءً على طلب رئيسة الوزراء "غولدا مائير"، بسبب عملية "ميونيخ" اللي حصلت خلال بطولة الألعاب الأولمبية سنة 1972.

عد عرض الفيلم اتكلمت الصحافة الأمريكية عن "حياد سبيلبيرغ الغريب" وشكه غير المبرر في السياسات الإسرائيلية، وعدم اقتناعه بقانونية أفعال وسياسات الموساد. الفيلم من بطولة Eric Bana، Daniel Craig، Mathieu Kassovitz ، Geoffrey Rush.

Turtles Can Fly -2005

سنة 2003 في مخيم للأكراد وقت بداية الغزو الأمريكي للعراق بيحاول "سوران" أو "ستالايت"، 13 سنة، والمعروف بهوسه بالتكنولوجيا. قدر يقنع كبار السن في القرية إنهم يبيعوا أجهزة الراديو الخاصة بيهم ويشتروا طبق من الأقمار الصناعية عشان يقدرا يشوفوا  أخبار الحرب وسقوط صدام حسين، وكلهم أمل إنهم يرجعوا بلدهم لكن كمان خايفين من تبعات الحرب.

 الفيلم تم إنتاجه سنة 2005 من تأليف وإخراج Bahman Ghobadi

SYRIANA-2005

فيلم بيتكلم عن صناعة وتجارة البترول في الشرق الأوسط، من خلال قصة المحامي الأمريكي المشهور اللي بيسهل عمليات الاندماج المريبة لشركات البترول، في نفس الوقت اللي بيعاني فيه سمسار بترول في سويسرا من مأساة شخصية وفرصة لحل كل مشاكله بزيارة لواحدة من العائلات المالكة العربية عشان يدخل شراكه مع الأمير الخليجي.

الفيلم بطولة George Cloony- Matt Damon- Jeffry Right  ومن إخراج Stephen Gaghan

The Honorable Woman – 2014

بتدور أحداث المسلسل بين إنجلترا والضفة الغربية وفلسطين المحتلة، واعتبره النقاد وقت عرضة "محاولة نادرة لمعالجة القضية الفلسطينية- الإسرائيلية دراميًا"، بتركز أحداثه بشكل أساسي على "نيسا شتاين" اللي بتورث تجارة الأسلحة عن أبوها الصهيوني وبتحاول بعد ما اتقتل إنها تصحح أخطائه بإنها تساهم في تعزيز المصالحة بين الإسرائيليين والفلسطينيين. 

المسلسل من بطولة Maggie Gyllenhaal- Stephen Rea- Lubna Azaba