البطولات المجمعة دايمًا أحلى بكتير من الماتشات الأسبوعية أو الشهرية، وكاس العالم هو أحلى البطولات المجمعة. بيقولوا كاس العالم له لعنة، بتخلي كل منتخب يكسبه، يلعب بطولة تقرف في الدورة اللي بعديها، حصلت مع فرنسا في 2002 والبرازيل في 2006 وإيطاليا 2010 وأخيرًا إسبانيا 2014. غير اللعنة، كل مونديال بيكونله ضحية، منتخب الكل مراهن عليه فالكل أمله يخيب، وله حصان أسود، منتخب الكل مستنيه يبقى حصالة، فيكون شبح البطولة. عشان كده الرهان حرام والرهان في كاس العالم تحديدًا هبل. تفتكر أهم المنتخبات اللي كنت مستني منها كتير في المونديال وجلت منهم ومنك؟

1- نيجيريا 1998

كاس العالم في فرنسا 1998، كل اللي بيحبوا الكورة بيصنفوها كأحلى بطولة عالم اتفرجوا عليها لغاية النهاردة، والنسخة دي فضلت محتفظة برقمها كأكتر بطولة اتسجل فيها أهداف لفترة طويلة. في البطولة دي نيجيريا كانت داخلة بسقف توقعات مايقلش عن أي فريق عالمي، خصوصًا بالجيل اللي كان معاهم واللي قدر ياخد ذهبية أوليمبيات "أتلانتا" 96 من الأرجنتين والبرازيل.

جيل كان فيه أوكوشا وكانو وصنداي أوليسيه ورشيدي يكيني وتريبو ويست وبابا نجيدة، جيل لاعيبة كان العيال بيغلبوا بيه منتخب العالم في "اليابانية"، بس تقول إيه بقى؟ القرعة مبدئيا وقعتهم في مجموعة مع إسبانيا وبلغاريا وبارجواي، نزلوا أخدوا أول المجموعة، وشلفطوا بلغاريا وإسبانيا واتدلعوا في آخر ماتش قدام البارجواي، بس كانوا ضمنوا صدارة المجموعة ولعبوا مع الدنمارك في دور ال16، شالوا 4/1 وروحوا.

2- الأرجنتين 2002

أنا بحب بطولة "كوريا واليابان" وتقريبًا ماحدش غيري بيحبها لأنها كانت بطولة فاشلة جدًا، بس الورقة اللي كنت معلقها بمجموعات البطولة ومواعيد الماتشات وذكرياتي مع منتخب السنغال، بتخليني أفتكر البطولة بالخير. الأرجنتين كعادتها في بطولات كاس العالم، بتدخل ويتحط جنب اسمها كلمة (المرشح الأول للقب)، بس يا سيدي وقامت واخده يمين في شمال من إنجلترا والسويد ورجعوا على "بيونس آيريس" بدري بدري بعد الدور الأول.

فرقة فيها باتيستوتا وأورتيجا وديغو سيموني وفيرون وأيالا وزانيتي ووالتر سامويل وإيمار وكريسبو، أكيد هو مرشح أول للقب، أو أكيد على الأقل مش هيخرج من الدور الأول. غير لو فشلوا يكسبوا السويد في آخر ماتش، بعد ما "أندرس سفينسون" حط جول التعادل من ضربة ثابتة نفذها بعظمة.

من ضمن ذكرياتي عن البطولة دي كان برنامج "اللعب في الصندوق" اللي الخطيب بيحلل فيه الماتشات على البورد بتاعته، وبعد خروج الأرجنتين، عرض المخرج الشاب "محمد نصر" لقطات لبكاء لاعبى الفريق الأرجنتيني على أغنية أمير الغناء العربي هاني شاكر "إلا دموعك أنت". بس هي ما فرقتش كتير، كل مرة بيقولوا الأرجنتين مرشح أول للبطولة، لحد ما ييجي منتخب غشيم يفتري عليهم وغالبًا بيبقى أول حرف من أسمه "ألمانيا".

3- المنتخب الإنجليزي عن مجمل أعماله

11 إبراهيم سعيد في الملعب دول ولا إيه؟ مش ممكن المنتخب ده والله، مافيش بطولة بيدخلوها غير وبيكون معاهم سكواد يقدر يزيح الأخضر واليابس، بس آخرهم هما اللي بيتزاحوا. بطولة 2002 عملوا أداء ضعيف في مجموعتهم قصاد الأرجنتين ونيجيريا والسويد، وصعدوا تاني مجموعة بعد السويد المفاجأة، رغم التشكيلة اللي فيها لاعيبة زي أوين وبيكهام وسكولز وفيريديناند وسول كامبل وأشلي كول.. إلخ. قبل ما رونالدينو يضرب ديفيد سيمان على قفاه ويعلقله كورة ترجعه هو وباقي فرقته على بلدهم.

خش بقى على كاس عالم 2006، تلاقي تشكيلة فيها جيرارد ولمبارد وبيكهام وروني وأشلي كول وفيرديناند.. إلخ برضه، وبرضه يعملوا أداء ضعيف ويخرجوا. منتخب غريب واتحاد كورة بيعين مدربين أغرب وحاجة تشل، إيه ماكلارين وهودسون دول؟ يدربوا منتخب ليه؟ يدربوا ليه أصلًا؟ وليه نص ملعب فيه جيرارد ولمبارد وبيكهام يبقوا مش عارفين يلعبوا جنب بعض؟  ليه بشجع إنجلترا أصلًا؟

آخر خيبات الإنجليز كانت الخروج من الدور الأول في كاس عالم 2014، بعد ما خسروا من أورجواي وإيطاليا واتعادلوا مع كوستاريكا، بس هو اللي يخلي مدرب زي روي هودسون أغلى راتب أوروبا يبقى يستاهل.

4- البرتغال 2002

البرتغال ماكانتش مرشح قوي للبطولة، لكن الأداء اللي عملوه في بطولة يورو 2000، خلى كل اللي متابعين كورة مستنين يتفرجوا على المنتخب ده تاني بعدها بسنتين في كوريا واليابان. لو مش فاكر، فالمنتخب ده في يورو 2000 وصل لنص النهائي، ومر في طريقه منتخبات زي إنجلترا وألمانيا وتركيا، وقدر يكسبهم بأداء ونتيجة، لكن خرجوا من نص النهائي قدام فرنسا 2/1، واللي هتكمل وتاخد البطولة بعدها.

ها يا برتغال، هتعملي إيه في كاس العالم؟ ربنا كرم بمجموعة نص كم فيها أمريكا وبولندا والمضيف كوريا الجنوبية. تقوم البرتغال بقيادة فيجو وروي كوستا، تخسر من أمريكا ومن كوريا وتودع البطولة من دورها الأول، وحاجة منتهى "كان في الإمكان أفضل مما كان" خالص.

5- البرازيل 2006

الفريق اللي كسب بطولة 2002، داخل بنفس التشكيل تقريبًا لبطولة ألمانيا 2006، صحيح رونالدو وزنه زاد ومستواه قل، بس جنبه في أدريانو اللي طالع بسرعة الصاروخ، وتحته هيلعب كاكا ورونالدينيو، اللي صحيح برضه كانوا موجودين في بطولة 2002، بس المرة دي هما أحسن اتنين لاعيبة في العالم.

بدأت البرازيل البطولة بأداء موازي للتوقعات، كسبوا ال3 ماتشات وجابوا 7 أهداف في الدور الأول بس، كملوا الأداء بفوز 3 صفر قدام غانا في دور ال16، ونجح رونالدو إنه يبقى صاحب الرقم القياسي لأكتر لاعب أحرز أهداف في كاس العالم كمان. كله ماشي تمام، لحد ما وقعوا مع فرنسا.

فرنسا بدأت البطولة وهي بعيدة عن التوقعات، بس الفريق قوي وفيه لاعيبة خبرات زي هنري وفييرا وزيدان، ولاعيبة تانية شباب زي ريبري ومالودا وأبيدال، خليط ممتاز فضل يتسحب يتسحب لحد ما وصل نهائي وكان بينه وبين الفوز خطوات. في ماتش دور ال8 بين فرنسا والبرازيل، قدم زيدان أحسن ماتش في حياته، يكاد يكون كان بيلاعب البرازيل لوحده. خرجت البرازيل بجول هنري وأظن البرازيليين نفسهم كانوا بيشجعوا زيدان بعد اللي عمله في الماتش ده، بس في نفس الوقت خسرت البرازيل جيل عظيم كان متوقعله ينزل يعبي الكاس في شوال.

6- البرازيل 2014 برضه

منتخب كوميدي والله، بس كانت البطولة على أرضه وفيه جيل لطيف من اللاعيبة ونيمار ماحدش قادر يوقفه، فالفرصة لطيفة وننزل ناخد البطولة أو حتى نوصل لأدوار متقدمة فيها. ده اللي هما عملوه فعلًا ووصلوا دور ال4، بس مع أول منتخب منظم يقابلوه، ظهرت البرازيل كفرقة بتلعب كورة في الشارع، لا تنظيم ولا تكتيك ولا مدرب ولا أي حاجة. 7/1 يا مؤمن على أرضهم وسط جمهورهم، وفي ماتش التالت والرابع قصاد هولندا، خسروا 3 تانيين مع الرأفة.

عمومًا ذكريات البرازيلين مع تنظيم البطولة مش حلوة خالص، بعد ما خسروا نهائي البطولة سنة 50 على أرضها في ستاد "المريكانا" من أورجواي 2/1، وفي 2014 خرجت بفضيحة هتفضل موجودة في سجلات كاس العالم واكتفت بالمركز الرابع.

7- هولندا وإيطاليا 2018

هولندا وإيطاليا مش في كاس العالم 2018، هو عمومًا الجيلين الحاليين في إيطاليا وهولندا أقل بكتير من الأجيال السابقة، بس ده مايمنعش إنهم كانوا يقدروا يوصلوا كاس عالم بسهولة، ولما تشوف جدول التصفيات وازاي كل فرقة منهم خرجت هتحس بده أكتر. إيطاليا طلعت في المركز التاني بعد إسبانيا، وده كان كافي عشان تدخل ملحق ضد السويد، وهوب خسروا في مفاجأة من اللي بيحلوا كاس العالم.

هولندا كانت واخداها من أولها وضيعت فرصتها من البداية، في مجموعة تصفيات كان فيها فرنسا والسويد وبلغاريا ولوكسمبورغ وبيلا روسيا. بعد التصفيات غيروا المدرب وجابوا رونالد كومان، وممكن يبدأوا يبنوا جيل جديد فيه عناصر كويسة زي فان دايك وفينالدوم وديباي لو ربنا هداه، وبشكل عام مدرسة هولندا مش بتاعت بطولات، بس يقدروا يطلعوا فريق تاني بسرعة يرعب أوروبا وبرضه مش هيكسب في الآخر.

كل بطولة بيكون في فرق الكل متوقع منها تبقى منافس وبعدين أملهم بيخيب، وعلى العكس بتكون في مفاجآت، فاتفرج بأعصاب هادية وماتراهنش بأعصاب جامدة غير على الألمان. ابعد عن فرنسا أنا قولتلك أهو، فريق عظيم بس مدرب على قده جدًا، وطبعًا إنجلترا هتحرق دمنا.