مين قال إن الممثلة اللي بتعمل إغراء فاشلة ومابتعرفش تتكلم غير بجسمها؟ مش يمكن المخرجين هما اللي حصروها في الأدوار دي؟ أو عملت كده عشان توصل للي هي عايزاه؟ الليست دي فيها 7 ممثلات بنقول عليهم ممثلات إغراء ومش منهم هند رستم أو مديحة كامل اللي كلنا متأكدين إنهم عباقرة تمثيل وقدرناهم بعد كده، لكن دول ممثلات إغراء تقريبًا ماعملوش حاجة في حياتهم جد إلا قليل أوي..

منال عفيفي

أول معرفتي بالممثلة العظيمة دي كان فيلم عرق البلح، وتحديدًا أداءها في أغنية "بيبة" لو شفت الأغنية هتفضل تسأل مين اللي بتغني مع عبلة كامل وشيريهان وعارفة تجاريهم دي؟ بس لما دورت اكتشفت إنها تقريبًا ماعملتش دور تاني جد في حياتها غير "الأبواب المغلقة" اللي برضه طلعت فيه "شمال" بس مثلت حلو جدًا، ودايمًا بتصنف إنها ممثلة إغراء، بس كل ما برجع اتفرج على "عرق البلح" بتحسر عليها!

عبير صبري

أدوار مثيرة للجدل ونقلع الحجاب ونلبس الحجاب، عشان في الآخر الناس تفضل تقول علينا ممثلة إغراء، بس شفت فيلم "عصافير النيل"، الست دي ممثلة تقيلة فعلًا، بس هي تقريبًا بتحب حالة الجدل المثارة حولها، أو يمكن الناس حصروها في الدور ده.

ناهد الشريف

دي أول ممثلة مصرية ظهرت في مشهد عريانة تمامًا، في فيلم "ذئاب لا تأكل اللحم"، هو عمومًا فترة السبعينات دي كانت مليانة أفلام "بورن" بس ماكانش فيه حد بجرأة ناهد الشريف، سيبك من الأدوار الكبيرة لناهد بقى واتفرج على دورها الصغير في "العمر لحظة" .. بني آدمة تانية خالص، بنت غلبانة وجدعة وجميلة، ممثلة شاطرة فعلًا.

ناهد يسري

دي بقى نجمة السبعينات وبطلة "سيدة الأقمار السوداء" أنت لو شفت بوستر الفيلم ده بس هتتصدم، لكن اتفرج كده على شغلها القديم وهي صغيرة، رغم إنها أدوار عبيطة في "شاطئ المرح" أو "المساجين التلاتة" أو شوف صورتها وهي صغيرة هتكتشف إنها كانت في يوم بريئة.

منى حسين

فاكر فيلم رانديفو؟ أيوه هما بيكتبوه كده مش غلطة، كان فيه ست بيحاولوا يظبطوها، هتعرف وشها أول ما تشوفها، انسى ده بقى وافتكر فيلم عصافير النيل تاني، هتلاقي دور وهي عجوزة وكبيرة وشخص تاني خالص.

دعاء حجازي

فاكر فيلم الدادة دودي؟ الست اللي كلموها العيال وكانت "عاهرة"، لو اتفرجت على "سابع جار" هتشوفها في دور جديد عليها تمامًا وهي زوجة بتتكلم جد وبتعزف مزيكا وجوزها عنده اكتئاب، أنا ماصدقتش إنها نفس الشخص أصلًا.

صفوة

هي أصلًا راقصة فبتتصنف إغراء، بس حتى وهي بتمثل إغراء زي دورها في "هي فوضى"، ممثلة جامدة وتقيلة برضه، بس إغراء عن إغراء يفرق برضه.