خبر صغير تقراه في جرنال عن فارس مصري اتأهل لبطولة العالم في لعبة الفروسية، تدوّر على اسمه، مافيش حاجات كتير في المواقع والجرايد المصرية، اتحاد الفروسية نفسه مش هتلاقي عنه أخبار كتيرة، رغم إنها لعبة باشاوات يعني! اللاعب اسمه علاء ميسرة، والبطولة هتكون السنة الجاية. أسهل حل علشان تعرف معلومات أكتر إن خالك يكون رئيس الاتحاد المصري للفروسية مثلًا! أو تجيب رقم علاء وتكلمه. من حسن حظنا إنه كان واقف في الزحمة فكان عنده وقت طويل يرد على أسئلتنا، شكر خاص للحركة المرورية في مصر.

خلينا نجيب الموضوع من الأول، البداية: "ابتديت وأنا عندي 7 سنين ويمكن 5 سنين كمان، كنت واحد من أصغر الناس اللي ابتدت في العرب وأصغر واحد في مصر. دخلت أول بطولة ليا وأنا 7 سنين". بداية علاء كانت غريبة، بدأ وهو طفل عنده 5 سنين، وبدأ مع والده اللي كان ساعتها عنده 42 سنة، يعني أكبر واحد يبتدي وأصغر واحد يبتدي كانوا من أسرة واحدة.

بيكمل علاء "أبويا فضل يدعمني لحد وقت معين، لكن اللي علمني بشكل مظبوط كان شريف الدمرداش، وبسبب شريف جات فترة اتحاد الشرطة". نادي اتحاد الشرطة الرياضي شاف في علاء ناشئ كويس وممكن يطلع منه حاجة، "جابولي حصان ودعموني بشكل كويس، ابتديت أكسب بطولات كتير في الناشئين، وأسوأ نتيجة حققتها بالحصان بتاع اتحاد الشرطة، كانت تاني جمهورية. وكسبت بطولات في المجر والتشيك وسوريا وأبو ظبي.. إلخ".

علاء دلوقتي مش ناشئ، وبقاله أكتر من 30 سنة بيركب خيل، لكنه بيفتكر سبب من الأسباب اللي خلت جيله قوي في رياضة الفروسية، "الاتحاد المصري ابتدا يركز على الناشئين فعملنا معسكرين واحنا 17 سنة و18 سنة، خدونا هولندا صيفين ورا بعض استفدنا بيهم جدا واتعلمنا وأخدنا خبرات".

بعدها كان الاتحاد المصري بيجهز فريق لأولمبيات أتينا 2004، رغم إن علاء ماتأهلش لكنه بدأ مرحلة جديدة لما راح يتدرب مع كريم الزغبي، الفارس المصري المحترف في هولندا، "فضلت أتمرن معاه 10 سنين، وقتها كان دعم الاتحاد الشرطة ليا لسه شغال". بعد الثورة دعم اتحاد الشرطة الرياضي لعلاء قلّ، "شايف إن ده طبيعي علشان ساعتها الناس كانت هتصرف فلوس تجيب عربيات ومعدات ولا تجيب خيل؟ وقتها وقفت لعب للشرطة".

في 2013 علاء قرر يبقى عنده الحصان بتاعه، فاشترى هو وواحد صاحبه حصان صغير عنده 3 سنين، وبدأ معاه خطوة خطوة، لغاية ما اتأهل بيه لبطولة العالم في 2018. "سيبت كريم وبقالي 4 سنين في فرنسا شغال لوحدي تمامًا بالجهود الذاتية وبدون دعم من أي حد. حصاني ابتدا يكبر، وبدخل بيه البطولات العادية اللي حواليا في فرنسا، وبعدين ربنا كرمني وعرفت أروح بطولة خيخون في أسبانيا سبتمبر 2017"

4 سنين من التعب، لغاية ما حصان علاء بقى جاهز وكلّم الاتحاد المصري قالهم "حصاني كبر وجاهز، عاوز أكون في البطولة دي حتى لو هشارك كاحتياطي مش أساسي". البطولة كانت في إسبانيا، تحديدًا مدينة خيخون، دخل علاء وعمل نتايج كويسة، كانت كفاية علشان يتأهل لبطولة العالم 2018.

سألته: قولت في الأول إنكم كان بيتعملكم معسكرات، ودلوقتي بتقولي إنك شغال مع نفسك، الاتحاد بطل يدعمكم؟ قال "مافيش أي معسكرات من منتخب مصر، كل حد بيشتغل مع نفسه ومجهودات وبيفحت في الصخر على قد ما يقدر"، رغم كدة علاء مش شايف إن ده غلط من الاتحاد، "الاتحاد مايقدرش يشيل كل حاجة، أتمنى يكون في دعم من رجال الأعمال بشكل أكبر".