"مش فاهمة ازاي ممكن تنسى أول حد حبيته، يعني حتى لو نسيت الشخص، هتنسى ازاي إحساسك والكلام اللي قولته". إحسان عبد القدوس كان له وجهة نظر مختلفة عن البنت اللي قالتلي الكلام ده، وكان شايف موضوع الحب الأول ده اشتغالة. في الصحافة بيكون أول موضوع كتبته له ذكرى خاصة، حاجة مابتنسهاش وتفضل فاكرها وأنت مبسوط، ده مايمنعش إن بعد فترة هتقراه تاني وتحس إنه كان وحش، وإنك لو رجع بيك الزمن هتقطعه، أو على الأقل هتعيد فيه حاجات كتير، وكان ممكن يتكتب بشكل أحسن. عينة عشوائية، بس مش من بتوع مركز بصيرة، اتكلموا عن أول علاقة ليهم، وموضوع الحب الأول ده خدهم لغاية فين، ولو كانوا بيمثلوا في فيلم الوسادة الخالية، كانوا هيشوفوا مين ع المخدة الفاضية؟ بعيدًا عن إن المشهد كان fake وعبد الحليم مابيعرفش يمثل.

- لا بص، أنا أول علاقة ليا دي ماعتبرهاش حب أصلًا، لا أثرت فيا ولا نيلة

-- لا ما أنا مش عاوزك تكلمني عن لعب العيال بتاع ابتدائي، بتكلم عن أول علاقة بجد

- أنا جيبت سيرة ابتدائي ولا أنت بتجود؟

-- آسف. اتفضل

- تاني علاقة هي اللي أثرت فيا، علاقة لسه مش عارف أعديها، انتهت غصب عني وكل حد فينا قال للتاني خد بالك من نفسك وبس.

في بداية الألفية تقريبًا، حصلت حادثة مشهورة في منطقتنا، بعد ما أهل بنت رفضوا يجوزوها الولد اللي بتحبه، ده بيحصل كتير، اللي خلاها مشهورة، هي إن الولد بعد محاولات انتهت باليأس، ولّع في نفسه وراح –وهو بيشتعل- للبنت في السوبر ماركت اللي بتشتغل فيه، علشان يشوفها آخر مرة قبل ما يموت، أو ممكن علشان يخليها تشوفه وهو بيموت بسبب حبهم. لو كان استنى شوية مش كان ممكن يعدي الموضوع؟ أو حتى يحاول تاني! كانت تستاهل أوي يعني؟ طب لو حد كنت مستعد تولع في نفسك علشانه، ممكن بعدين تتجاوز علاقتك بيه، وتقدر تشوف حد تاني مكانه؟

- ممكن احكيلك أنا بقى

-- اتفضلي يا أستاذة

- كنت في الجامعة، استهبلنا سوا سنة بعدها ارتبطنا 10 شهور، هو أذاني نفسيًا جدًا، رغم كده كنت فاكره إنه الحب الأول

-- واكتشفتي إيه بعدها؟

- إنه إيه العبط ده؟ حتى من قبل ما أحب تاني كنت وصلت للنتيجة دي

-- يعني بتعترفي إنك نسيتيه وحبيتي تاني؟

- اه يا عم، علاقة ماكملتش برضه بس دي بقى العلاقة اللي أثرت وهتفضل معلمة معايا طول العمر، مش الأولانية خالص.

نفس البنت بتحكيلي عن ولد فضل 15 سنة يحبها بلا انقطاع رغم إنها رفضته:"هو حرفيًا كل يوم مع واحدة، بس اللحظة اللي بشوفه فيها، بعرف إنه ماتغيرش من ناحيتي، ولسه بيتمنى إننا نحاول بس أنا مش شايفه إنه ينفع".

 المحبة مش حاجة سهلة، عارف إن التاريخ كان في اتنين "قيس" مش واحد بس؟ قيس مجنون ليلى والتاني مجنون لبنى، هما ماكانوش مجانين حرفيا، بس اعتبروهم مجانين من شدة حبهم. المهم، بتاع لبنى كان قيس بن ذريح، واتجوزها فعلًا والحياة كانت حلوة، بس بعدها لقاها مابتخلفش، طلقها، وقبل ما تاخدي القصة تشيريها على صفحة "ثورة البنات"، أحب أقولك إنه اتمرمط من بعدها. جوز لبنى الجديد قفش، بس كان جينتل، قالها يا تفضلي معايا يا أطلقك وتروحي تشوفي الراجل اللي بيطرطش أشعار عليكي في كل حته ده، وعلشان الحب حلو اه حلو أوي، اختارت لبنى ترجع لقيس، بس ماتت قبل ما يتجوزوا تاني وهو اتصدم وحصلها.

-- علاقة الحب الأول بتاعتك وصلت لإيه دلوقتي؟

- كنت معجب بحاجات فيها وحاجات تانية لأ وهي والعكس، فضلنا سوا شوية وماكملناش حسب طلبها

-- مانفسكش تاخد فرصة تانية في الموضوع

- لو في فرصة، هعلمها السحر

-- يعني إيه؟

- حاجة مش هينفع تكتبها

-- تمام شكرًا

واحدة من اللي سألتهم، قالتلي إنها كانت بتقول لحبيبها، كان نفسي تكون أول حب في حياتي، كان بيرد ويقولها إن بإدراك الشر بنميز الخير، ولو ماعيشناش حاجة وحشة مش هنعرف إن اللي بعد كدة حلو، ولازم نعيش وهم علشان نشوف الحقيقة ونعرف نفرق بينهم، "اللي قالي كدة انفصلنا عن بعض وقدرت اتخطاه، بحس بالذنب وأنا بقول ده وبحس إني ماكنتش بحب كفاية، بس برجع أدرك إن ده كان لازم يحصل، أنا مش بحبه ومش عايزة أرجع، بس لسه لما تيجي سيرته بتلفت ولسه وجوده مهم، يمكن مش بنفس المعنى الأولاني بس خد شكل تاني جوايا". كل الكلام ده، اللي واضح فيه بالنسبالي ارتباك شديد، مش عن علاقة أولى خالص ولبنى عبد العزيز اللي كانت بتظهر ع المخدة، جزء من مخطط صهيو أمريكي مش أكتر.

- علاقة الحب الأول بتاعتي بتحسسني بالذنب، ده اللي فاضل منها بس

-- ذنب ليه أنت كمان؟

- علشان ماحبيتهاش خالص، هي حبتني وبعد ما استجابت ليها، حسيت إني لازم أهرب

- وبعدين؟

-- عملت ده، بس لسه علاقتنا كويسة وممكن نتكلم عادي.

- بس ده مايعتبرش حب، بتجاوب ليه أنت أصلًا؟

-- .........

لما بتسأل ناس عن رأيهم في حاجة معينة، بتحاول تركن مفاهيمك ومعتقداتك الشخصية على جنب، من باب إنه ماتحكمش على حد، ومن باب إن "أَحَسِبَ النَّاسُ أَنْ يُتْرَكُوا أَنْ يَقُولُوا آَمَنَّا وَهُمْ لَا يُفْتَنُونَ" وإن اللي على البر عوام، كل اللي بتقوله وفاكر نفسك تقدر تعمله، بيتغير في لحظة، لما تبقى في موضع اختبار حقيقي، لما تشوف نفسك على حقيقتها، فبراحة على نفسك.

-- احكي

- اه يحب مرتين عادي جدًا والمرة الأولى أحسن من التانية مش بس بكتير، ده مافيش مقارنة أصلًا

-- ده أنت شايل

- لا خالص، العلاقة الأولى كانت مع شخص مش وحش أبدًا، بس العلاقة هي اللي كانت وحشة وطولت أكتر من اللازم وأنا اللي فضلت ماسك وبحاول، بس في الآخر بلح، بعدها كنت مقتنع إن مافيش حاجة ماتقدرش تتخطاها، وتخطيت الموضوع فعلًا وبقيت فلة، بس المرة التانية، عرفت فيها يعني إيه علاقة تبقى محور حياتك وبتخليك أحسن نفسيًا وعمليًا ومبسوط ومستقر ومرتاح

-- الحب الحقيقي؟

- بيعيش يا حبيبي

 إحسان عبد القدوس قال إن الحب الأول هو الحب الأخير، وأنت وكيفك بقى