"البرشامة".. اتفرج على ملخص لكل ماتشات الأسبوع
أنت محتاج في حياتك كابتن مصطفى أبو قمر الحكم الدولي السابق، لما كان بيطلع كل يوم اتنين على القناة السادسة المحلية، يذيع لقطات وأهداف من الدوريات الأوربية كلها، أينعم مش بتكون عارف دي أجوال جديدة ولا قديمة، بس أنت معجب بالشخص اللي بيعرفك على كرة قدم النصف الآخر من الكرة الأرضية، في فترة زي نهاية التسعينات.
دلوقتي أنت مش محتاج كابتن مصطفى عشان ممكن تجيب كل حاجة أونلاين، بس لو شغلك والتزاماتك بيضرب حبك للكورة بالجزمة، الكبسولة دي كل أسبوع هيكون فيها كل الهايلايتس والأرقام والإحصائيات للدوريات ال5 الكبرى، اللي هما الإنجليزي، الإسباني، الإيطالي، الألماني، والفرنسي. لو واحد كان واقف في البلكونة وسألني: طب فين الدوري المصري؟ أحب أقوله: لما يرجعولنا الكورة هنشوفق الحوار ده حاضر.
الدوري الإنجليزي
على ملعب أولد ترافولد، قدر اليونايتد ياخد أول 3 نقط في الموسم. يونايتد كالعادة مع مورينيو، بيخسر الاستحواذ وبيعمل أقل عدد من المحاولات على المرمى بس بيفوز حتى ولو بأداء هجومي ضعيف. اليونايتد اتقدم بهدفين لبوجبا ولوك شو، قبل ما جيمي فاردي يقلل النتيجة لليستر سيتي في الدقايق الأخيرة.
أحسن لاعب في الماتش هو الفرنسي بول بوجبا وأخد تقييم 8.37 من موقع whoscored. أحسن لاعب من طرف ليستر كان الجناح جراي بتقييم 7:43 من نفس الموقع. شوف كل إحصائيات الماتش من هنا
أهم لقطة كانت عودة لوك شو لتقديم أداء قوي، خصوصًا إنه كان مهمش من المدرب جوزيه مورينيو ومتوقع رحيله وسبق وصرح المدرب الموسم اللي فات بإنه غير راضي عن أداء الباك الشمال بتاعه.
لو بتلعب فانتازي، اليونايتد عندهم الماتش الجاي مع برايتون. ماتش نوعًا ما سهل ودي خيا عنده فرصة كويسة يعمل كلين شيت وممكن حد من لوكاكو وسانشيز يكون صفقة ربحانة. أما ليستر فعندهم نيو كاسيل، خلي عنيك على فاردي وجراي.
نيوكاسيل من قبل بداية السيزون وعندهم مشاكل، فترة إعداد أي كلام ومافيش صفقات اتعملت ومدربهم رافا بينتيز كل يوم كان ماسك في خناق الإدارة. رغم كل ده الفريق ماظهرش بشكل سيء أوي، أو كان أفضل من المتوقع، رافا برضه مدرب كبير. الناحية التانية توتنهام ماعملوش ولا صفقة في الصيف، بس قدروا يحافظوا على تشكيلهم القوي ومافرطوش في أي لاعب.
الماتش خلص 2/1، سجل لتوتنهام فيرتونخين وديلي آلي وسجل لنيوكاسيل خوسيلو. الماتش ماكانش فيه تفوق كبير في الملعب لفريق على حساب التاني، ده هيبان بشكل كبير في الأرقام والإحصائيات وعدد المحاولات على المرمى والاستحواذ. شوفها كلها من هنا
في الفانتازي حط عنيك على إريكسن وهاري كين، خصوصًا إن ماتشهم الجاي مع المستجد في البريمرليج فولهام.
بورنموث كسب كارديف سيتي 2/0 بأهداف فريزر وويلسون وكمان ضيعوا ضربة جزاء. الماتش الجاي كارديف هيقابل نيو كاسيل، وبرونموث هيقابل ويستهام.
شوف أرقام وإحصائيات الماتش كلها من هنا. لو حاطط عنيك على حد في الفانتازي يبقى فريزر وويلسون من بورنموث، خصوصًا إنهم هيلاعبوا فريق هجومي زي ويستهام مع بلجريني وهتكون في مساحات ممكن استغلالها.
الماتش الأول لتشيلسي مع مدربهم الجديد ساري. 3/0 للبلوز، نتيجة كبيرة بأداء قوي وإن كان الخصم ضعيف. تقدر تتوقع من طريقة لعب ساري الهجومية، إننا داخلين على موسم كبير لهازارد، اللي هيكون صاحب الكورة المتحرر من كل الواجبات غالبًا. وطبعًا بيدرو اللي كان أحسن لاعب في الماتش بتقييم 8.3. باقي أرقام الماتش من هنا
تشيلسي هيلعب ماتشه الجاي مع أرسنال، ماعتقدش حد من الفريقين هيعمل كلين شيت في الماتش ده، فلاعيبة الفانتازي حطوا عنيكم على هازارد وويليان وبيدرو كمان ممكن.
فولهام رجع أخيرًا للبريمرليج، وعمل صفقات مفروض إنها قوية، زي سيري وشورليه. بس بداية غير موفقة قصاد كريستال بالاس. البالاس فرقة رخمة في المطلق، ومع الصفقات الجديدة متوقع إنهم يكونوا أفضل ومايصارعوش على البقاء لحد آخر نفس.
الماتش خلص 2/0 أحرزهم شالوب وزاها، والأخير جدد عقده مع الفريق اللندني بعد كلام كتير عن عروض واحتمالية رحيله. شالوب صاحب أول هدف كان هو برضه أحسن لاعب في الماتش. تقييمات اللاعيبة كلها من هنا.
الماتش الجاي للفريقين هيكون صعب. البالاس هيلاعبوا ليفربول وفولهام هيلاعبوا توتنهام. بس زاها من البالاس ممكن يتعب دفاع ليفربول. لو ناوي تاخد حد من عندهم في الفانتازي، هو أنسب خيار.
أحسن حاجة للفرق اللي بتكون في النص التاني من الجدول، إنها تبدأ الموسم بماتش مش صعب وتقدر تكسب وتاخد ثقة وتدمج الصفقات الجديدة مع اللاعيبة القدام. واتفورد وبرايتون ماتش من النوع ده، بس اللي أخد الجمل بما حمل هما واتفورد وكسبوا 2/0.
أحسن لاعب في الماتش طبعًا هو بيريرا اللي أحرز جولين واللي لو ناوي تاخده في الفانتازي، فهو عنده ماتش مع بيرنلي، وبيرنلي مع شون دايتش فرقة رخمة جدًا ومنظمة وتضايق أي حد دفاعيًا. شوف أرقام الماتش كلها من هنا
أحلى ماتش في الأسبوع كله. الولفس اللي معاهم استثمار قوي جدًا وداخلين عشان يكونوا قوة جديدة في البريمرليج، بيلاعبوا إيفرتون العريق اللي جايب مدرب جديد وعامل موسم انتقالات قوي.
خلص الماتش 2/2 وأبطال الماتش هما برضه كانوا أحسن لاعيبة في الأسبوع بالنسبالي، روبن نيفيز وريتشارلسون، اللي لو بتلعب فانتازي هات واحد منهم على الأقل.
شوف كل أرقام الماتش من هنا
أول ماتش رسمي لليفربول بعد الصفقات الجديدة اللي خلت الناس ترشحهم للمركز الأول في الدوري. الخصم هو ويستهام اللي جابوا مدرب خبير وعملوا صفقات قوية، أهمها فليبي أندرسون وجاك ويلشر. رغم كده الماتش تقريبًا كان وان سايد جيم.
ليفربول حسموا النتيجة ب4/0 وكانوا ممكن يزيدوا بدون أي خطورة لويستهام تقريبًا. الحفلة دي شارك فيها صلاح بجول وماني جولين وستوريدج جول. شوف كل أرقام الماتش من هنا وراهن بقلب جامد على ثلاثي ليفربول لو أنت من اللي بيلعبوا الفانتازي
أقل ماتش من ماتشات الجولة كلها. مش هيحصل حاجة لو ماتفرجتش أساسًا
قمة الأسبوع الأول والماتش المنتظر من جماهير أرسنال عشان يشوفوا شغل مدربهم الجديد أوناي إيمري، فيحسوا أثناء وبعد الماتش إن مافيش لا شغل ولا نيلة وإيه اللي بيحصل ده؟!
2/0 للسيتي ونتيجة كانت ممكن تزيد. جاب الأجوال ستريلينج وبيرناردو سيلفا. في الوقت الحالي تم إعلان إصابة كيفن دي بروين وفي انتظار تحديد مدة غيابه، ده معناه إن التشكيلة الحالية هتكمل زي ما هيا وتقدر تشتري بيرناردو سيلفا أو محرز في الفانتازي وأنت مطمن وإن شاء الله خير يعني.
شوف كل أرقام الماتش من هنا
أحسن لاعب: بيريرا من واتفورد
أحسن فريق: ليفربول
أحسن ماتش: إيفرتون VS ولفز
أحسن هدف: روبن نيفيز في إيفرتون
شوف ملخص للأسبوع الأول كله من الدوري الإنجليزي من إعداد صفحة شوف بريمير
فانتازي البريمرليج عبارة عن لعبة افتراضية، بتاخد 100 مليون تشتري بيهم فريق من 15 لاعب، ولو اللاعيبة دي عملت أداء كويس في الماتشات الحقيقية، أنت بتاخد نقط في الماتشات الافتراضية.
كاس السوبر الأوروبي
كام يوم والدوري في إسبانيا يبدأ. على ما يبدأ خد نبذة عن اللي هتتفرج عليه، من خلال ماتش السوبر الأوروبي بين الريال واتليتكو. دييجو سيموني عمل مشروع خطواته تصاعدية، بداية من إنه فريق أندردوج، إمكانياته قليلة وصفقاته محدودة، وصولًا لكونه دلوقتي أكتر فريق بيصرف في إسبانيا، وعنده تشكيلة أغلى من تشكيلة ريال مدريد.
خلص الماتش 4/2 وفتح كلام كتير عن إمكانية تعويض رونالدو وزيدان اللي الفريق خسرهم في الصيف الحالي، وإذا كانت التشكيلة الحالية للفريق قوية كفاية عشان تنافس محليًا وأوروبيًا.
شوف كل أرقام الماتش من هنا
كأس السوبر الألماني
على ما الدوري الألماني يبدأ، البايرن بيمارس هوايته المفضلة وبيتشطر على خلق الله في المانيا وبيكسب السوبر الألماني على فرانكفورت بنتيجة 5/0 مع الرأفة. أرقام الماتش من هنا
الدوري الفرنسي
1- مارسيليا VS تولوز
اكتسااااح. 4/0 لمارسيليا في بداية الدوري الفرنسي. شوف أرقام الماتش وإحصائيات كلها من هنا
2- نانت VS موناكو
موناكو اللي غربل معظم فريقه تقريبًا، قدر يحقق الفوز على نانت بنتيجة 3/1. أرقام وإحصائيات الماتش هنا
3- نيس VS ستاد ريمس
نيس بيخسر 1/0 على أرضه في أول ماتش. أرقام وتفاصيل الماتش من هنا
4- مونبلييه VS ديجون
ديجون بياخد أول 3 نقط بره أرضه، وبيفوز على مونبلييه 2/1. الأرقام والإحصائيات من هنا
5- أنجيه VS نيم أوليمبك
في واحد من أحلى ماتشات الأسبوع، أنجيه خسروا على أرضهم من نيم بنتيجة 4/3. أرقام وإحصائيات الماتش من هنا
6- ليل VS ستاد رين
ليل بيحقق أول 3 نقط في الدوري على حساب رين بنتيجة 3/1. أرقام وإحصائيات الماتش من هنا
7- سانت إتيان VS جانجون
2/1 لأصحاب الأرض وأول 3 نقط. الأرقام والإحصائيات
8- ليون VS أميان
ليون اللي رجع لدوري الأبطال، أخد أول 3 نقط على أرضه بعد مكسب 2/0. كل حاجة عن الماتش هتلاقيها هنا
9- بوردو VS ستراسبورج
ستراسبورج حقق مكسب 2/0 بره أرضه على بوردو. الأرقام والإحصائيات
10- باريس سانت جيرمان VS كاين
البطل باريس سان جيرمان بيحقق أول فوز ليه مع توماس توخيل على حساب كاين 3/0 إحصائيات الماتش
