كفاية برفانات ومحافظ .. هدايا مختلفة للرجالة في عيد الحب
الرجاله متعبين طول عمرهم، حتى يوم ما نحب نفرحهم نفضل نلف حوالين نفسنا مش عارفين نجيبلهم هدية إيه؟ مش واضحين وسهلين كده زي البنات! ولأن دواليب الرجالة بقت عبارة عن أزايز برفيوم كتير مرصوصة جنب بعضها زهقوا منها، فاحنا سألنا مجموعة منهم تحب البنت تجيبلك إيه؟ وجبنالك الخلاصة، عيد ميلاد، عيد جواز، anniversary ، تخرّج، ترقية شغل، عيد حب .. كل دي هدايا تنفع وماتموتش
أهلاوي؟ عليكي وعلى store النادي الأهلي في مدينة نصر، ولو زملكاوي سور نادي الزمالك، أما بقى لو فريقه المفضل مش مصري، هتعرفي بيتباع فين من البادچ على التيشرت، ممكن تلاقيها Nike أو Adidas أو Puma، ساعتها تروحي على فروع المحلات دي، أو لو عطلتي خالص بقى، أو لاقيتي علامة ماتعرفيهاش، تطلبي التيشرت من بره ويوصلك شحن لحد بيتك أو بيته.
دي أحلى هدية ممكن تيجي لراجل في حياته تقريباً، هيحبك ومش هيسيبك ابدًا، ولو الجهاز كله غالي عليكي، ممكن تشوفي لو ناقصه دراع مثلا، أو تشتريله أحدث DVD للجيم المفضلة بالنسباله.
أسعار الريسفرات دلوقتي مش غالية أوي وكلها معاها اشتراك سنة مجاناً لقنوات معينة، لو بيحب الكورة وجبتيله اشتراك لـBeIN sport هيحبك أكتر بكتير، بس خلي بالك إنه هيتابع كل الماتشات وغالبا هتتقابلوا كل سنة مرة.
زي ما عايزاه يوفر فلوس الفرح وتطلعوا رحلة، وفري أنتي فلوس الهدايا وطلعيه رحلة، معاكي أو مع أصحابه بقى، بس يستحسن مع أصحابه؛ هيحبك أكتر بكتير ساعتها وهتوحشيه ويرجع مشتاق، يعني الموضوع مليان مكاسب.
لو بتحبيه فعلاً هتبقى مهتمة بشغله وهواياته، فممكن مثلا لو بيحب التصوير تجيبي عدسة كاميرا، أو لو دايزنير ممكن تجيبله Wacom، لو معاه اسكوتر ممكن خوزة، لو بيحب المزيكا سماعة أصلية، لو غاوي تكنولوجيا وكمبيوتر Hard disk external، لو بيسافر كتير شنطة مناسبة لرحلاته، لو مهاجر بره مصر وربنا كرمه هاتيله حاجة مناسبة للبلد اللي رايحها، نضارة شمس لو حر، أو كوفية لو برد، أوعي تعمليله أكل من ايدك أو مامتك تعمله عشان هيحس انه هيتدبس في جوازة.
لو هو غاوي عمق ومطربين معينين، جربي تروحي جاليري حيفا مثلًا، هتلاقي فيه نوت بوك، وميداليات وسلاسل.
لو بيحب يسمع المزيكا هاتيله شرايط كاسيت، هي انقرضت بس هيحبك انك لسه فاكرة انه بيحب ده، لو بيحب السينما اطبعيله تيشرت عليه صورة حد بيحبه بس مش ممثلة عشان ميتحفلش عليه، بوستر فيلم مثلًا.
ساعة، محفظة، ميدالية، ولاعة.. الهدايا دي بتعيش مع الرجالة وبيحبوها مهما مر الوقت. لو عايزة ""ساعة"" ممكن تجيبها من Fossil ،Casio ،Omega حسب الفلوس اللي معاكي والنوع المفضل ليه، بس اتأكدي إنه بيحب الساعات وبيلبسها.
لو فكرتي في ""محفظة"" هتلاقيها في جاليري سامي أمين، موجود في الزمالك ومصر الجديدة ومنتجاته بتتباع في أماكن تاني، بس متجبيش المحفظة غير لو محفظته اتسرقت مثلًا، أو لو محفظة عليها لوجو النادي اللي بيحبه.
لو شايفاه محتاس بمفتاحيه ""الميدالية"" ممكن تكون هدية عملية جدًا، وتقدري تختاري ما بين الفضة اللى تقدري تعمليها عمولة في الصاغة أو تنقي بين أشكال كتير.
لو مُدخن وبرنس كده ممكن يتبسط لو جبتي ""ولاعة""، وطبعا مش هتشتريها من على الرصيف، محل zebra هيبقى ممتاز جدا.
في كل الأحوال لو بيحبك أي هدية منك هتعجبه، بس بلاش الأنتيكات –إلا لو هو غاوي جمعها- وبلاش هدوم –إلا لو هو جوزك-، والهدايا الرومانسية ده حوار تاني بيبسط الرجالة في مواقف معينة، بس الأكيد إن سعادتهم بيه مش زي سعادتنا.
أما بقى لو عايزة تكسبيه طول العمر ويعيش خاتم في صباعك، وعمره ما يخونك، ويقول عليكي إنك اكتر واحدة فاهماه، فالحل صوباع حشيش، ونوعدك إنه هيفضل أسبوع بينفذ كل أوامرك.
