شريف الفخراني مدير المشروعات بشركة "مواصلات مصر" قال إن تم الاتفاق مع شركة جوجل عشان خطوط سير أتوبيسات الشركة، تكون متاجة على تطبيق جوجل مابس. الخدمة الجديدة هتتيح للعميل إنه يعرف وقت وصول الأتوبيس للمحطة ومدة الانتظار وزمن رحلته من وقت الركوب ولغاية محطة الوصول.

من ناحيته علق الدكتور هشام طه، الرئيس التنفيذي لشركة مواصلات مصر، على الاتفاقية الجديدة بين الشركة وجوجل وقال إن الهدف منها تحسين خدمات النقل العام الحضري المقدمة للمواطنين، والاتفاقية دي هتخلي القاهرة أول مدينة في إفريقيا والشرق الأوسط تستخدم خرائط جوجل في معرفة توقيتات وصول أتوبيسات النقل العام.

عشان تستخدم الخدمة كل اللي عليك هتفتح جوجل مابس على موبايلك وهتلاقي أيقونة في التطبيق اسمها مواصلات مصر، دي هتنقلك حركة سير الأتوبيسات من أول ما تتحرك ولغاية ما توصل، ومن المتوقع إن الخدمة دي هيستفيد بيها أكتر من 8 مليون شخص في القاهرة و6 أكتوبر وزايد في السنتين الجايين. شركة "مواصلات مصر" بتشغل أكتر من 56 أتوبيس على 6 خطوط وسعر التذكرة من 5 جنيه ل15 جنيه وفي أتوبيسات بيكون فيها إنترنت مجاني وتكييف.