"E-nable Egypt" أو "تمكين مصر" هو مشروع بدأه عمر أيمن في مصر لصناعة الأطراف الصناعية للأطفال اللي فقدوها في حوادث بتر أو بسبب أمراض أو اتولدوا من غيرها، وكان الدافع لبداية المشروع هو وقت تأزم الحرب السورية في بدايتها وانتشار فيديوهات لأطفال فقدت أطرافها.

تعاونت "تمكين مصر" مع شركة "اطبع لي" اللي بتستخدم تقنية الطباعة ثلاثية الأبعاد وقدمت المساعدة عن طريق توفير أسعار مخفضة لطباعة الأطراف الصناعية،  وبدأوا في تصنيع الأطراف اللي وصل سعر الواحد منها قبل التعويم لحوالي 1200 جنيه.

خطوات صناعة الأطراف بتدأ باالتواصل مع الحالة، وأخذ المقاسات وبعد كده مرحلة الطباعة وبعدين مرحلة التجميع، والعملية الكاملة بتاخد شهرين تقريبا عشان تتم.

المشروع قدر لحد دلوقتي يسلم 11 طرف صناعي جديد للأطفال في مصر، بدأوا بخديجة وعمرها 11 سنة من المنوفية في 2016 عن طريق انهم صمموا لها ذراع متحركة وتنفيذ أول يد ثلاثية الأبعاد في مصر، بالإضافة إلى توصيل الأطراف لطفلين في سوريا و 5 أطفال في أمريكا.

المشروع المصري بيعتبر امتداد لـ "E-Nable"  العالمية اللي بدأها زوجين أمريكين في 2011عام وكانوا صمموا ذراع متحركة بنفس التقنية لطفل هناك، وبعدها قدروا يوصلوا يد صناعية لنجار إفريقي فقد إيده وبعد كده انتشرت الفكرة فقرروا ينشأوا مؤسستهم الخيرية.