الإمارات كل سنة بتنظم حدث ومكان اسمه القرية العالمية، بيضم أكتر من 75 دولة حول العالم، وطبعًا الحضارة المصرية دايمًا بتكون حاضرة فيه. السنة دي الإمارات بنت نموذج عملاق للأهرامات وتمثال ضخم لأبو الهول، باعتبارهم أحد عجائب الدنيا السبع. 

الجناح المصري على مساحة 3 آلاف متر مربع، ويحتوي على 76 محل، فيهم مختلف أنواع البضائع والمنتجات المصرية، وفيه كمان قرية تراثية مصرية، فيها حرف يدوية زي الفخار والسجاد وصناعة البردي والنحاس والخيامية. 

ولأول مرة هيكون فيه محلات بتبيع الفسيخ والحلويات والمخللات والقهوة المصرية والشمعدان ومنتجات بسكو مصر وحلويات المولد، زي المشبك والحمصية والسمسمية واللب والفول السوداني ولبان سمارة.

العارضين في الجناح ده بيلبسوا لبس فرعوني وفيه فنانيين بيكتبوا أسماء وعبارات خاصة على البردي أو بالرمل اللي بيجي مخصوص من مصر.