مجموعة من سكان منطقة "الزمالك"، قالوا إنهم قلقانين من انتشار المياه الجوفية، نتيجة عمليات الحفر في الخط التالت للمترو. "زينات عبد العزيز" من سكان الزمالك، بعتت لموقع "المصري اليوم" على الواتس آب، صور من عمليات الحفر، صورتها من بيتها وبتبين انتشار المياه الجوفية، وبتقول "زينات" إن مع بداية عمليات الحفر، حصل قلق كبير بين سكان المنطقة، خصوصًا إن المنطقة معروفة بقربها جدًا من النيل، وده مسبب قلق بين السكان على المباني والبيوت.

من المعروف إن كان فيه حالة استياء كبيرة بين أهالي حي الزمالك، من ساعة الإعلان عن حفر الخط الجديد تحت شوارعهم، وكان من أوائل مخاوفهم إن الزمالك عبارة عن جزيرة، وده معناه إن المياه الجوفية هتكون موجودة فيها بكثرة وعلى عمق منخفض، وده اللي ممكن يهدد أساسات العمارات، وهيتسبب في خروج المياه للسطح وانتشار الأمراض.

"محمود يسري" من سكان الزمالك، قال في حوار سابق مع "المصري اليوم" إن "ولو فرضنا إن دا مش هيحصل وإنه تم دراسة المنطقة بحيث لا يؤثر الحفر على المنازل والعمارات، فاحنا عايشين في حي راقي والمترو هيحوله لمنطقة شعبية ومش بعيد نلاقي (توك توك) عندنا، والأولى أن يتم مد المترو للمناطق اللي بيسكنها عدد كبير من الناس اللي بيستخدموا الوسيلة.