يوتيوب أعلنت رسميًا بداية خدمة جديدة اسمها "يوتيوب غو"، ودي هتساعد المستخدمين اللي ماعندهمش نت سريع وتخليهم يقدروا يتفرجوا على فيديوهات يوتيوب من غير إنترنت. الهدف من الخدمة الجديدة، إن شركة يوتيوب المملوكة لجوجل، عاوزة تحسن وجودها في الدول النامية اللي فيها سرعات إنترنت ضعيفة.
الخدمة هتقدر تستخدمها من موبايلك، لو اتفعلت عندك، هتلاقي علامة داونلود جديدة، جنب علامات اللايك والديس لايك، لما تضغط عليها هتسمحلك تحتفظ بالفيديو لمدة 48 ساعة، ممكن تتفرج فيهم على الفيديو من غير إنترنت، لكن مش مسمحولك بالخدمة دي من أي كمبيوتر أو لاب توب، في نفس الوقت الشركة قالت إن مش كل الفيديوهات هتنفع تشغلها من غير ما تتصل بالنت.