النهاردة محكمة القضاء الإداري بمجلس الدولة، حكمت بوقف نشاط وتراخيص "أوبر" و "كريم" في مصر، نتيجة قبول الدعوى القضائية اللي أقامها مجموعة من سواقين التاكسي الأجرة. مقيمو الدعوة قالوا إن الشركتين بيشتغلوا بشكل مخالف للقوانين، وبيستخدموا العربيات الملاكي في نقل الركاب مقابل أجر، رغم إن العربيات دي مرخصة للاستخدام الشخصي فقط، وأكدوا كمان إن دخول العربيات الملاكي في عمل عربيات الأجرة بيسببلهم خساير مادية كبيرة.

هل حكم النهاردة هيترتب عليه وقف نشاط الشركات دي في مصر؟ شركة "أوبر" ردت في بيان رسمي لمجلة "الفصلة"، أكدوا فيه على احترامهم الكامل لأحكام القضاء وإنهم مش هيعلقوا على الحكم بأي شكل لأنه لسه تحت المداولة، وأضافت الشركة إنها هتتقدم بطعن في المحكمة المختصة، وإن الحكم مش معناه إن الخدمة وقفت بالعكس، هتستمر بشكل طبيعي جدًا.

"أوبر" وضحوا في بيانهم إنهم دايما بيدعموا الاقتصاد الوطني، وقدروا في 2017 يوفروا 150 ألف فرصة شغل في مصر، وشغالين حاليًا ومن سنتين مع اللجنة الوزارية المكلفة بتقنين نظام النقل التشاركي اللي الشركة شغالة على أساسه. في ختام البيان، قالت الشركة إنها هتشتغل دايمًا مع كل الجهات بما فيها التاكسي الأبيض، عشان يضمنوا استفادة الملايين بالخدمة وتطوير القطاع ده في مصر.