استضاف برنامج "صباح العربية"، الدبلوماسية والفنانة الإماراتية "آمنة الفرض"، اللي دخلت موسوعة جينيس مرتين بعد ما قدرت تحقق الرقم القياسي في أكبر مجموعة من العرايس المصنوعة من الورق، "آمنة الفرض" كانت حققت الرقم القياسي لأول مرة في 2013، لما قدرت تصنع ألف و145 عروسة مجسمة مصنوعين من الورق والصمغ بس، ورجعت تاني دخلت الموسوعة في 2017 بعد ما اتغلبت على رقمها وعملت ألف و540 عروسة ورقية.

"آمنة" حكت ازاي بدأت رحلتها مع فن "لف الورق" وازاي اتعلمته، قالت إنها في 2004 كانت بتحب تلعب بالورق، بعدين فكرت تجيب كتب من على النت تساعدها تتعلم أكتر، فاشترت كتب كتير بتتناول فن صناعة الورق، وابتدت تصنع العرايس بكل أنواع وألوان الورق، وفازت بالمركز الأول في مسابقات عالمية، في أمريكا وبريطانيا.

لكن لما كسبت في المسابقات دي، بقى مش من حقها تقدم فيها تاني، وده اللي خلاها تفكر في إنها تدخل موسوعة جينيس، وقتها كان عندها بالفعل 400 عروسة، لكن اكتشفت إن أقل رقم تقدر تشارك بيه هو ألف قطعة، وإن لازم القطع كلها تبقى مختلفة ومافيهاش تكرار.

فابتدت تعمل عرايس أكتر مختلفة الأشكال لحد ما خلصت ألف و145 عروسة، كسبت بيهم الرقم القياسي في 2013، وهو الرقم اللي زودته عشان تكسب تاني السنة دي.

"آمنة بتقول إن الفن ده اسمه "لف الورق" وإن موطنه الأصلي مش آسيا لكن فرنسا وإيطاليا، وإنها بتحاول حاليا تنشره في العالم العربي.