أم كلثوم مثال على شخص هيفضل عايش ومش هيتنسي، أغانيها لسه الناس حافظاها وبتسمعها وترددها، سيرتها في كل مكان، والجديد بقى إنها لسه بتبيع وبتعمل فلوس لحد النهاردة. الشاعر فوزي إبراهيم، أمين صندوق جمعية المؤلفين والملحنين، قال إن أم كلثوم بأغنيتها ألف ليلة وليلة، حققت أعلى إيرادات في 2017، ضمن قايمة الأغاني والألحان القديمة اللي بيتم إعادة استخدامها.

الحكاية إن لو في أي حد عاوز يعيد استخدام لحن قديم أو كلمات أغنية قديمة، لازم يدفع فلوس للملاك الأصليين، وأغنية ألف ليلة وليلة، هي أكتر أغنية اتدفعلها فلوس في 2017 علشان إعادة الاستخدام. فوزي قال إن الجمعية حصلت 18 مليون في 2017 إجمالًا. ألف ليلة وليلة اتعملت سنة 1969، من كلمات مرسي جميل عزيز وألحان بليغ حمدي.