وزارة الإسكان كشفت عن تفاصيل كراسة شروط حجز 2048 وحدة سكنية بتشطيبات فاخرة في العاصمة الإدارية الجديدة، كمرحلة أولى، في الحي السكني "كابيتال ريزيدانس"، وموزعة بواقع 1056 وحدة بالمجاورة "D1"، و992 وحدة بالمجاورة "D8"، وده بعد ما تم إطلاق الموقع الإلكتروني للراغبين في الحجز، وبدأ التسجيل على الموقع وهيستمر ليوم 31 يوليو، لقراءة كراسة الشروط ومعرفة تفاصيل الشقق المعروضة من حيث المساحة والسعر وأنظمة السداد.

كراسة الشروط فيها تفاصيل زي إن سعر المتر وصل لـ 11 ألف و250 جنيه، وإن أقل سعر للشقة وصل لـ مليون و363 و500 جنيه، ودي الشقق في الدور الأرضي، ومساحتها 120 متر مربع، وأعلى سعر وصل لـ 2 مليون و179 ألف و800 جنيه، ومساحتها هتكون 173 متر مربع، على حساب سعر المتر 11 ألف و250 جنيه. 

الجديد في كراسة الشروط، إن لأول مرة تحدد فيها وزارة الإسكان سعر لكل شقة على حدة، رغم وجود مئات الشقق متساوية المساحة والسعر، وكمان لأول مرة يتم تحديد سعر جراج السيارة في بدروم نفس العمارة اللي هتكون فيها الشقق، وسعره هيكون 60 ألف جنيه، هيتم تسديدها على مرة واحدة.