السكك الحديد في مصر هي تاني سكك حديد في العالم كله، بعد سكك حديد إنجلترا، والأولى في الوطن العربي، وعشان كده متحف السكك الحديد الموجود في رمسيس -عند محطة القطر- هو التاني في العالم بعد المتحف البريطاني. المتحف ده اتأسس بطلب من الملك فاروق، وافتتح في يناير 1933، واتقفل من سنة 2010 للترميم واتفتح تاني في مارس 2016.

يوم الخميس الجاي 1 مارس المتحف هيتفتح مجانًا للجمهور بمناسبة إنه عدى سنتين على افتتاحه، المتحف فيه مجسمات للقطارات في مصر من يوم ما بدأت وكل أشكالها، من أيام "وابور الفهم"، ومن أهم مقتنياته القطار الملكي من أيام الخديو إسماعيل سنة 1859، وفيه عربيات البضايع ونموذج للكباري القديمة في مصر، وعقود السكك الحديد من يوم ما بدأت في مصر، وفيه أول آلة لطباعة التذاكر سنة 1890. 

المتحف مفتوح للجمهور من 9 الصبح لـ 2 الضهر كل يوم ما عدا الاتنين، لكن يوم الخميس الجاي 1 مارس هيكون مجانًا.