شهر مارس مش هنبقى بنبالغ لو غيَّرنا اسمه وبقى شهر الستات، هتلاقي فيه يوم المرأة العالمي ويوم المرأة المصرية وعيد الأم، أعياد مرأة كتير يعني. بس بصراحة الستات بشكل عام والست المصرية، اللي بتمثل 48.8% من المجتمع المصري، بشكل خاص تستاهل.

عشان الستات أو النسوان يستاهلوا، وعشان كلمة "شغل نسوان" مش سُبة ومابتقللش من قيمة المنتج، عملنا حملة #شغل_نسوان عشان نحكي قصص ستات بيشتغلوا في مهن مش متعودين نشوفهم فيها، قابلنا نجارة وسواقة ميكروباص ومدربة سكوتر ورافعة أثقال وغيرهم. قابلنا 18 ست عشان يقولوا لنا كلمة "شغل نسوان" بتمثلهم إيه وعايزين يوصلوا لفين في مجالهم.

بمناسبة الستات وشغلهم وأعيادهم، امبارح صدرت أخر احصائية طلعت من الجهاز المركزي للتعبئة والإحصاء وكشفت إن في 3.3 مليون أسرة بتعولها ست، يعني حوالي 14% من الأسر، وده رقم جديد وكبير وصادم لناس كتير. مش بس كده، كمان نسبة الستات اللي بيشتغلوا بداوم كامل 76.5% في مقابل 71% للذكور، أين اللي بيقول ناقصات عقل ودين مايطلعوش من بيوتهم ومكانهم المطبخ أنا لا أراه؟!

شارك في الحملة عن طريق هاشتاج #شغل_نسوان وخلّي الستات الجدعة والملهمة في حياتك يحكوا لنا حكايتهم.