من فترة، كان وزير التموين الدكتور علي المصيلحي، أصدر قرار بيلزم فيه كل البياعين إنهم يحطوا ورقة عليها سعر المنتج اللي بيبيعوه، علشان يحاولوا يتجنبوا اللعب في الأسعار، والاستغلال اللي بعض التجار بيقوموا بيه ضد الزباين. النهاردة المصيلحي كان في اجتماع مع وكلاء الوزارة ومساعد وزير الداخلية لمباحث التموين، علشان يستعدوا لتنفيذ القرار من بداية يناير 2018.

في الاجتماع تم الاتفاق على إن كل تجار التجزئة هيطلعوا فاتورة، مكتوب عليها بوضوح سعر البيع للمستهلك وممنوع أي جنيه زيادة يتحط أكتر من الرقم المكتوب. كمان يجوز الإعلان عن أسعار المنتجات، عن طريق ورقة تتلزق على المنتج أو تتحط تحت الأرفف بتاعت السلعة بس تكون باينة وواضحة للمستهلك.