بعد حادثة "مريم"، الطالبة المصرية المسلمة اللي اتقتلت في بريطانيا، وبدأت الصحف والجرايد والمجلات تهتم بحوادث العنصرية ضد المسلمين هناك، صحيفة "الإندبندنت" قالت إن واحد من كل 3 مسلمين بيعيش في خوف بسبب سوء المعاملة في الحرم الجامعي في بريطانيا، والستات  اللي بيلبسوا لبس إسلامي تقليدي خايفين أكتر على سلامتهم.

وقالت الصحيفة البريطانية إن اكتر من نص عدد الطلاب المسلمين بيتعرضوا للإساءة عبر الإنترنت، وكشف استطلاع الاتحاد الوطني البريطاني للطلاب إن معظم الطلاب اللي عانوا من سوء العاملة قالوا إنه بسبب إنهم مسلمين.

في الوقت ده زادت عدد الجرائم اللي بتستهدف المساجد في المملكة المتحدة أكتر من الضعف ما بين 2016 و 2017. والدراسة قالت إن 43% من الطلبة المسلمين مبيحسوش بالراحة لما بيتم مناقشة الإرهاب في الفصل، وبيحسوا إن مالهمش مساحة آمنة في الحرم الجامعي.