أغلبنا بيقعد يتفرج على مسابقات الجمال ويسأل نفسه إزاي قدروا يحافظوا على شكلهم بالطريقة المثالية دي في الوقت اللي احنا بنغسل وشنا قبل الشغل بالعافية ونحس بإنجاز عظيم لو حد نزل الجيم مرة كل ٦ شهور.

في خلال الأسبوعين اللي جايين Event 4 U هيجيبوا ملكة جمال الكون  لـ٢٠١٦ لحد عندنا في مصر، Iris Mitteraere فرنسية الجنسية هتيجي تقضي ٦ أيام في القاهرة وهتلف في أماكن سياحية كتير مش بس في القاهرة لكن كمان في الأسكندرية ومش محتاجين نقول اننا مستنين الصور علي نار. Iris هتعمل مؤتمر صحفي وهتحضر ايفينت خيري واللي هيتم استضافته في السفارة الفرنسية يوم ٢٧ أكتوبر اللي جي.  

ايريس تعتبتر تاني ست فرنسية تحصل على لقب ملكة جمال الكون وطبعاً ورا نجاحها أسباب وانجازات كتير منها انها بتدرس عشان تبقى جراحة فم، ايريس بتمارس رياضة زي القفز بالمظلات والبانجي جامبينج.   

ملكة جمال الكون -اللي هتشارك في التحكيم في مسابقة ٢٠١٧- هتوصل مصر مباشرة بعد تجارب أداء ملكة جمال مصر للعالم واللي هتقام بردوا في القاهرة والمفاجأة بقى أن المجال مفتوح ليكي تقدمي لو انتي شايفة أنك مستعدة تمثلي مصر في واحدة من أكثر المسابقات الراقية في العالم، لو نجحنا نشجعك ممكن تنضمي لتجارب الأداء في ١١ أكتوبر الساعة ٦ مساءً لحد الساعة ٩ في فندق كايرو ماريوت.

هبة عبود مخرجة مسابقة ملكة جمال مصر والكون وملكة جمال مصر سابقاً قالتلنا “مفيش شكل لبس معين مطلوب في تجارب الأداء عشان احنا حابين نعرف ازاي كل متسابقة هتعبر عن نفسها وطريقتها في اللبس. يمكن دا يبان كليشية شوية بس الشكل في المسابقة مش كل حاجة احنا بندور على الشكل والعقل والمضمون” 
لو لسه مهتمة ممكن تشوفي الشروط اللي محتاجاها عشان تقدمي:

*لازم يبقي سنك بين ١٨ و٢٨ سنة

*مصرية الجنسية

*عازبة

*الطول ١٦٥ أو أطول

*بتتكلمي انجلش وعربي كويس جدا

ابعتي التفاصيل لـ event4uofficial@gmail.com أخر معاد للتقديم يوم الثلاثاء ١٠ أكتوبر.