عدوى الرسم والتلوين على الحيطان وصلت حلايب وشلاتين من خلال حملة "ايتنينا الجنوب" واللي معناها باللغة البجاوية التى بيشتهر بيها سكان منطقة حلايب وشلاتين "مرحبا الجنوب".

في زيارة استمرت 4 أيام، رسم حوالي 35 شخص من جامعات ومحافظات مختلفة من طلاب وخريجي كليات فنون جميلة على حيطان المحلات والأكشاك والبيوت في جنوب البحر الأحمر.

الشباب عدَّوا على مدن البحر الأحمر زي "القصير" اللي انضم عدد ممن أهلها لأصحاب المشروع.

ماكانوش متوقعين ترحيب الأهالي بالمبادرة للدرجة اللي تخليهم يطلبوا منهم يلوِّنوا منشآتهم برسومات من طبيعة شلاتين.

"آن محمد مدنى"، منسقة المشروع، قالت للمصري اليوم لايت إن الشباب المشاركين اتحركوا لدعم فكرة الهوية والتراث في المنطقة الحدودية دي، وإنهم متحمسين للمشروع بسبب حبهم للمكان وبيحاولوا يظهروا الجمال الموجود فيها ويختاروا الكلمات المناسبة للتعبير عن المكان.

وأكدت "مدني" إن كل المواد والبويات والفرش والخامات المستخدمة فى الرسم من تبرعات فريق العمل، وأن الأهالى استقبلوهم بعبارة :تعالوا ارسموا على محلى".

وقال "محمد جمال الجناينى"، خريج فنون جميلة الأقصر، إنه قرر المشاركة فى رحلة مشروع "ايتنينا الجنوب" لأنها الزيارة الأولى ليه فى شلاتين، وأتمنى إنها ينفذ المشروع فى أماكن تانية.