الحاجة "سعدية" عندها 75 واتقبض عليها في مطار نوبيع في السعودية أثناء رحلتها لعمل عمرة، عشان كان معاها شنطة فيها أنواع مختلفة من المخدرات. "سعدية" نفت التهمة من جانبها، وهي وأولادها وأهل قريتها في مركز "نبروه"، أكدوا إن تم استغلالها من شاب أدالها الشنطة توصلها مش أكتر.

الشاب المتهم باستغلال سكن أخته في نبروه في قرية "سعدية"، حسب رواية "سعدية"، طلب من أخته مساعدته في اختيار 10 سيدات من كبار السن عشان يدّيهم رحلات عمرة مجانية اتبرع بيها رجل أعمال سعودي بيعمل خير، فورًا اختارت أخته الست "سعدية عبدالسلام حماد"، وعرضت أخت الشاب على الحاجة "سعدية" كلام أخوها، وفي خلال 20 يوم الإجراءات خلصت وخدت "سعدية" تأشيرة السفر.

بتقول "هدى محمد"، بنت الحاجة "سعدية"، لموقع "الوطن" إن الشاب طلب من أمها إنها تستعد للسفر من غير ما تاخد معاها أي حاجة غير جواز السفر. واستناها في عربية بعيد عن البيت، وفي الطريق قبل ما يوصلوا المطار بربع ساعة، طلب منها تاخد معاها شنطة صغيرة فيها ملابس فاعل الخير في السعودية، الحاجة "سعدية" رغم بساطتها ارتبكت ورفضت، لكنه أقنعها إن الشنطة مافيهاش غير ملابس الراجل اللي اتحمل كل نفقات سفرها، فوافقت وأخدت الشنطة معاها.

وكملت هدى: "سافرت أمي وكان ده يوم الثلاثاء الماضي، وفضلت أطلبها بعد سفرها بس ماكانتش بترد عليّا، لحد ما ردت عليّا يوم الأربعاء، وقالتلي إنه تم القبض عليها في مطار ينبع. بعدها أخد ضابط سعودي الموبايل منها وقاللي إن أمي اتضبط معها مخدرات في شنطتها من أنواع مختلفة.

التحقيقات شغَّالة ولحد دلوقتي ماتمش إثبات صحة كلام "سعدية". ومن ناحية تانية، أكد مصدر أمني، أن الشاب النصاب جمع 10 جوازات سفر لـ10 سيدات من أهالي قرية "درين"، عشان يسفروهم في رحلة عمرة مجانية على روح والدة رجل أعمال سعودي، وقال إنه تم تحرير محضر في مركز شرطة نبروه من جوز بنت الحاجة "سعدية" اللي تم القبض عليها في السعودية.

وفي تطور مهم للموضوع، كتب "محمود التونسي" المدير التنفيذي لشركة السياحة اللي أصدرت التأشيرة للحاجة "سعدية" بوست يشرح فيه اللي حصل، وقال إن معاه فيديو يظهر فيه الشخص المتهم بالنصب على الحاجة "سعدية"، لقطته كاميرات المراقبة لما كان رايح للشركة ياخد جواز سفرها.