"نورهان" بتصمم لوحات بالمسامير والخيوط الملونة
نورهان الغنام فنانة سترينج آرت، بتعمل لوح فنية بالمسامير والخيوط الملونة، نورهان بتقول انها علمت نفسها بنفسها، في البداية كانت بتشوف صور على الإنترنت، وتجربها على لوح خشب، واحدة واحدة ابتدت تعلم، استخدمت في البداية الالواح الخشب اللي بيتقطع عليها الخضار والفاكهة، لكن مع زيادة الطلب، ابتدت تنوع في الخامات واشتغلت عي أنواع متصنعة من أنواع مختلفة من الخشب.
"منة حسين فهمي" بنت الفنانين حسين فهمي وميرفت أمين عجبتها فكرة صديقتها وشجعتها تتوسع، اختارت معاها اسم المشروع "String Duckie"، ونورهان بعتتلها لوحة لكلبها واسمها، وابتدت تعمل دعاية للمشروع بتاعها عن طريق انها تبعت لوحات للفنانين والمشاهير على إنستجرام، واللي بيعيدوا نشرها كدعاية ليها، زي "أحمد فهمي"، "أيتن عامر"، "كندة علوش"، "مريم الخشت"، "بولا سالم" وغيرهم، وفعلا زاد الطلب على لوحها الفنية.
نورهان بتتمنى إن مشروعها يكبر وتقدر تبيع لوحها بره مصر، تقدروا تتفرجوا على بقية أعمالها وتطلبوا أوردرات من انستجرام وفيسبوك.
