وسط حضور من الممثلين وصناع السينما والصحفيين المهتمين بالسينما، اتعقد النهاردة أول مؤتمر صحفي للإعلان عن مهرجان الجونة السينمائي الدولي في نسخته الأولى، قال في بدايته "عمرو منسي" المؤسس المشارك للمهرجان، إنه بيضم أفلام من 34 دولة حوالين العالم، تحت شعار "سينما من أجل الانسانية".

مؤسس المهرجان "نجيب ساويرس" بيقول: إن منطقة الشرق الأوسط مصدر إزعاج للإنسانية، طول الوقت في هجرة وحروب ونزاعات، محتاجين نبقى مصدر فن، والعالم يفهم اللي بيحصل" وضاف لكلامه إن اختيار مدينة الجونة اللي أسسها أخوه رجل الأعمال "سميح ساويرس" فرصة كبيرة عشان تتحط المدينة على خريطة العالم، مدينة "كان" الفرنسية ماكنتش معروفة سياحيا قبل المهرجان، ما بقتش عالمية غير بعد استضافتها لأهم مهرجان سينمائى في العالم، وإن مدينة الجونة هتبقى أفضل من حيث البعد عن دوشة العاصمة وبيروقراطيتها، لكنه مش هيوقف دعمه برضه لمهرجان القاهرة السينمائي.

وجاوب على سؤال إن ليه المهرجان في النسخة الأولى ليه بيستعين بمدير للمهرجان مش مصري، قال إنه بيختار الأكفأ دوليا بغض النظر عن جنسيته، لإن المهرجان دولي، في نفس الوقت قال "سميح ساويرس" إن مدير البنك المركزي البريطاني "كندي" الجنسية، ومساعدته مصرية، وإن دايما الإختيار بيروح للأكفأ.

المهرجان اللي بيضم 3 مسابقات رسمية، الفيلم الروائي الطويل، والأفلام القصيرة، والأفلام الوثائقية، بيضم في إدارته الفنانة "بشرى" صاحبة فكرة المهرجان، "بشرى" قالت إن المهرجان مش هيبقى سنة وخلاص، ولا معمول سبوبة، الناس تتصور وتاخد جوايز وتمشي، لكنه هيبقى مصدر تنوير ثقافي وفني في المنطقة، وده سبب من أسباب إنه يتعمل في المعاد ده تحديدا بعد مهرجان "تورنتو" ومهرجان فينيسيا، عشان صانعي الأفلام يقدروا يشاركوا فيه، ونقدر إحنا نشوف الأفلام اللي كسبت في المهرجانات دي بحسب كلام "انتشال التميمي" مدير المهرجان.

حضر المؤتمر الفنانة الجميلة "يسرا" والمخرج الكبير "يسري نصر الله" واللي بيشاركوا في المهرجان كأعضاء في اللجنة الإستشارية الدولية للمهرجان، بالإضافة للفنانة "نيللي كريم" رئيسة لجنة تحكيم الأفلام القصيرة، ، والمؤلف الموسيقي تامر كروان عضو لجنة التحكيم، والفنان "أحمد الفيشاوي" والمخرج "عمرو سلامة" والمنتج "محمد حفظي".

المهرجان هيفتتح يوم 22 سبتمبر بالفيلم المصري "الشيخ جاكسون" اللي شارك في مهرجان تورنتو، وهيختتم بالفيلم الألماني-الأمريكي "Human Flow" يوم 29 سبتمبر 2017.