مجلة فوربس العالمية المتخصصة في الاقتصاد، أعلنت قايمة أغنى أغنياء العالم، وكان فيها 6 مصريين، وده تراجع عن قايمة السنة اللي فاتت اللي كان فيها 7 مصريين. أول المصريين الموجودين في القايمة، هو رجل الأعمال نصيف ساويرس، 57 سنة، وترتيبه رقم 251 في العالم بثروة 6.6 مليار دولار.

في المركز التاني نجيب ساويرس وثروته 4.4 مليار دولار، ودول يا دوب خلوه يحتل المركز 550 على العالم. في المركز التالت على مستوى مصر، حد مش من عيلة ساويرس، هو راجل الأعمال محمد منصور، واللي ثروته 2.7 مليار دولار وموجود في المركز 877 عالميًا، وبعديه رجل الأعمال ياسين منصور بثروة  1.9 مليار دولار وفي المركز ال1284 عالميًا.

رجل الأعمال محمد الفايد كان خامس المصريين في قايمة فوربس، بثروة 1.6 مليار دولار ومركزه على مستوى العالم ال1477. آخر مصري في القايمة هو رجل الأعمال يوسف منصور، في المركز 1650 عالميًا وثروته 1.4 مليار دولار.