بعد ما الباسبور الإماراتي حقق إنجاز كبير ووصل للمركز الأول عالميًا في مؤشر passport index اللي بيعتمد على عدد الدول اللي حامل الباسبور يقدر يدخلها بدون تأشيرة. قولنا نشوف الباسبور المصري يقدر يدخلك كام دولة، واتفاجئنا بالنتائج اللي عدت 55 دولة!

لو لسه ماعندكش باسبور، اعرف أكتر عن كيفية استخراج جواز السفر المصري الجديد.

أهم 10 دول ممكن تدخلهم بالباسبور المصري من غير فيزا:

1- لبنان

هتستلم فيزا عند الوصول، هتبقى صالحة لمدة 30 يوم مقابل 20 دولار. لكن بشرط إن الشخص يكون معاه 2000 دولار وقت الوصول برضه.

2- جزر المالديف

هتستلم فيزا عند الوصول صالحة لـ 30 يوم.

مجموعة جزر على المحيط الهندي في قارة آسيا، يعتبروا أحسن مكان ممكن تقضي فيه شهر العسل. لو ماسمعتش عنها افتكر صورة صلاح الشهيرة فيها.

3- ماليزيا

مش هتحتاج فيزا لمدة 90 يوم.

ماتصدقش إن ماليزيا عرضة للتسونامي طول الوقت، اعرف حالة الطقس وحضَّر شنطتك واتأكد إنك هتروح كوالامبور ولنكاوي وسيلانجور بما إنهم من أحلى المدن اللي ممكن تزورهم في ماليزيا.

4- هونج كونج:

مش هتحتاج فيزا لمدة 90 يوم.

الصين حلوة، ده بجد مش إفيه، روح بنفسك هونج كونج واحكم.

5- الأردن:

من غير فيزا، بس لازم توريهم تذكرة العودة أول ما توصل

لو عندك فوبيا التعامل مع أجانب لغتهم تختلف عنك، الأردن قريبة وعرب مننا فينا هتتكلم معاهم بالعربي براحتك.

6- نيبال:

هتستلم فيزا عند الوصول لمدة من 15، 30 لـ 90 يوم. بأسعار 24، 50، 100 دولار

من الدولة اللي تقدر تقضي فيها إجازة وماتدفعش كتير، الحاجات هنا مش غالية مقارنةً بدول سياحية شبهها. في نيبال هتقدر تجرب ركوب الأفيال ورياضات مائية مختلفة.

7- سيريلانكا:

ليها فيزا إلكترونية، كذلك الوضع مع دولة فيتنام.

8- غينيا:

مش هتحتاج فيزا خالص

9- تنزانيا:

هتستلم فيزا عند الوصول هتبقى صالحة لمدة 90 يوم، بـ 50 دولار.

10- كوريا الجنوبية:

هتستلم فيزا عند الوصول وهتبقى صالحة لمدة 30 يوم

مالناش دعوة بكوريا الشمالية، خليك في الجنوبية وهتتبسط.

من الدول اللي ممكن تسافرها من غير فيزا، بنين وبوليفيا وبوركينا فاسو وكمبوديا وكابو فيردي وجزر القمر وكوبا وجيبوتي ودومينيكا والإكوادور وإثيوبيا والجابون وغانا وغينيا بيساو وهاتي وإندونيسيا وإيران وكينيا ولاوس وليسوتو وماكاو ومدغشقر وجزر مارشال وموريشيوس وميكرونيزيا وموزمبيق وميانمار ونيكاراغوا وبالاو ورواندا وسانت كيتس ونيفيس وساموا والسنغال وسيشيل والصومال وسانت فنسنت وجزر غرنادين وطاجيكستان وتانزانيا وتيمور الشرقية وتوجو.