- طب وأهلك وحبايبك والمجتمع والناس؟

-- يا عم ما ك**هم وبعدين هو الجواز سهل؟ ده أنا عمي اللي مابحبهوش هيتحكم في جوازي ويرفض ويقبل.

نص محادثة مع بنت مصرية في العشرينات بتجاوب على سؤال: تتجوزي ولا تعيشي مع حد بتحبيه من غير جواز؟

أنت ربنا خالقك والسوفت وير اللي محطوط جواك بيخليك تنجذب لطرف آخر. الإطار أو القالب اللي الانجذاب ده بيتصب فيه، بتحدده حاجات كتير، زي الدين والعرف الاجتماعي ويمكن حتى القانون. بس لو جاتلك الفرصة تتجوز/ي الشخصية اللي السوفت وير بتاعك طبّع عليها، وجاتلك فرصة تانية إنكم تعيشوا مع بعض بدون جواز وبالقالب والإطار اللي أنتوا الاتنين لوحدكم هتختاروه، هتعملوا إيه؟ تتجوز/ي اللي بتحبه ولا تعيش معاه من غير جواز؟

لما سألت السؤال كان اهتمامي الأكبر بالبنات، البنات هيقولوا إيه وهيختاروا إيه؟ قولي اللي نفسك فيه وتفضليه براحتك، وكدة كدة اسمك مش هيتكتب فأنتي مش خسرانة حاجة، ومافيش ضغوط واقعة عليكي. الولاد مهمين، بس مش أوي بصراحة، خصوصًا إن الولد بيقدر يعمل اللي هو عاوزه ويتفاخر بيه كمان، أو يخفيه حسب رغبته، لكن البنت هي الطرف اللي الكل مركز معاها في خطواتها وتصرفاتها ومستنينها دايمًا تعمل الصح، اللي هما شايفينه يعني. كمان الاعتقاد السائد وجايز يكون اعتقاد حقيقي، إن البنات هما الطرف الأضعف واللي بيعانوا كتير وحياتهم بتتشقلب ملامحها بعد الجواز، فيا ترى لو متاح ليهم خيارات تانية هيعملوا إيه؟

- س، قولي يا ستي: تتجوزي اللي بتحبيه ولا تعيشي معاه من غير جواز؟

-- أعيش معاه من غير جواز طبعًا

- ماشي، اشمعنى؟

-- علشان أنا فاجرة وصايعة

- اوكيه دي حاجة تخصك، أنا عاوز أسباب تفصيلية  لو سمحتي

-- شوف يا سيدي، الجواز بيديك شعور إنك أخدت حاجة for granted، أنا بخاف من فكرة إننا خلاص اتجوزنا فأي حاجة هتتاخد بشكل إنك هنا على طول، نوع من أنواع التسليم، لكن لو أنت مكفولك حق إنك تمشي ف أي وقت، وقوانين الجواز دي كلها أنتوا هديتوها وحطيتوا حاجات تانية بتاعتكم، فليه لأ؟

- طب وأهلك وحبايبك والمجتمع والناس؟

-- ما ك**هم يا عم و بعدين هو في جواز سهل؟ دا انا عمي اللي مبحبوش هيتحكم ف جوازي ويقبل ويرفض.

أول بنت سألتها كان ده ردها، وانطباعها العام ماكانش ضد الجواز كمبدأ، لكن كانت شايفة الموضوع محتاج ضمانات كتير، لو الضمانات دي اتوفرت يلا نتجوز، ماتوفرتش فأنا موافقة اكسر كل اللي أنتوا شايفينه ده وأعيش مع حد اختاره بالإطار اللي يعجبني. على ذكر سهولة الجواز، لسه في بيوت بتطلب شبكة بالجرام وبمبالغ خيالية، وأم العريس بتراجع مع العروسة كل اللي بتجيبه من فوط وملايات وهدوم داخلية وخارجية، ونفذت الجانب الخاص بيها من الاتفاقية. لكن وجب الذكر إن كل اللي كلمتهم كانوا بيتكلموا عن مساوئ اجتماعية تخليهم يفضلوا العيشة من غير الجواز، حتى لو ماديًا مرتاحين.

من الآخر حد حاطك في دماغه وبلغ عنك، وساعتها ممكن تتوجهلكم تهمة استخدام عقار في أعمال منافية للآداب

قبل ما نكمل، هو القانون رأيه إيه؟ إيه اللي ممكن يتعرضله ولد وبنت عايشيين من غير جواز؟ بعد سؤال محامية، عرفت منها إن الموضوع بيتحرك بس في حالة التبليغ، يعني يكون من الآخر حد حاطك في دماغه وبلغ عنك، وساعتها ممكن تتوجهلكم تهمة استخدام عقار في أعمال منافية للآداب.  في نفس الوقت تقدر تحمي نفسك بورقة عليها اسمك واسمها وأرقامكم القومية وتوقيعكم، تحس السيستم عندنا بيحب اللي يلطخه على قفاه! موضوع الورقة ده كمان اعرف ناس كتير بتستخدمه لما يكونوا مسافرين مع بعض جوا مصر، وعاوزين يأجروا مكان يقضوا فيه كام يوم، أو حتى علشان يعدوا من الكماين بدون رخامة. لكن عمومًا، القائمين على تنفيذ القانون مش هيطلعوا يفتشوا بيت بيت، وهما مش مفروض أصلًا يكونوا مهتمين بمين عايش مع مين ولا مين اتجوز مين!

ملحوظة: السطور السابقة والتالية تعرض حكايات وآراء من على لسان أصحابها، ولا تحرض على أي حاجة ولا بتفتح عين البنات على حاجة، والكاتب هو شخص مسلم سني معتدل بيعيش ويتعايش ويحترم الإطار الديني والعرف الاجتماعي والدستور والقانون.. تمام كدة؟!

- ها؟ قوليلي بقى أنتي كمان عاوزة تتجوزي ولا تعيشي مع حد بتحبيه بدون جواز؟

-- الخيار الأول بالنسبالي هو الجواز طبعًا، لو عاوزين نتجوز ونقدر نعمل كدة حالا، يبقى ليه لأ؟ لكن لو مش قادرين نتجوز، هقبل بالحل التاني. لكن الجواز هو الأساس.

في 2016 مركز المعلومات التابع لمجلس الوزراء المصري، قال إن في حالة طلاق بتحصل كل 4 دقايق، وبتوصل ل250 حالة في اليوم. عدد حالات الخلع والطلاق عن طريق المحاكم كان أكتر من ربع مليون، وبزيادة 89 ألف حالة عن سنة 2015. الأعداد مرشحة دايما للزيادة، وسبق واتكلم عنها رئيس الجمهورية في خطبة من خطباته، مش شرط يكون ده سبب لان في ناس حابه أكتر فكرة العيشة بدون جواز، ولا معناها إن الناس هتبطل تتجوز علشان الناس مش هتبطل تتجوز، وحتى الثقافات المتعارف فيها على فكرة العلاقات والعيشة المشتركة خارج إطار الجواز، بيتجوزوا عادي.

- وأنتي رأيك إيه في الحوار ده؟

-- بص هي مش هتفرق معايا طالما عايشين مع بعض، بس هختار الجواز لأسباب دينية وعلشان أهلي كمان.

علشان مانتجاهلش الولاد تمامًا، طرحت السؤال في قاعدة مغلقة فيها حوالي 6 أشخاص، كلهم من محافظات مختلفة، ومختلفين في الثقافة ودرجة التدين، وكلهم كانوا عاوزين يتجوزوا ما عدا اتنين. واحد من الاتنين دول كان شايف إن مش الهدف إن تحصل بينا علاقة جنسية من غير جواز, بس احنا محتاجين نشوف ردود أفعالنا على بعض أول ما نصحى من النوم، ولما الغدا يتأخر، ولما حد فينا يشرب من ازاير المية ويسيبها فاضية، أو ينسى يخرج أكياس الزبالة، الحاجات العادية البسيطة أوي، اللي رغم بساطتها بتكون سبب في مشاكل كتير، لو عيشنا مع بعض فترة قبل الجواز وعرفنا التفاصيل الصغيرة دي، ممكن لما نتجوز نتجنب مشاكل كتير.

طبيعي الغالبية العظمى هتميل لفكرة الجواز، ده مامينعش إنك هتعدي على آراء تبدو – بالنسبالك- صدامية، ولازم تحترمها لأنها ماتخصكش.

هو غالبًا المصريين كلهم فاكرين الجواز بوس وأحضان وبس

- بتحبي واحد، تتجوزيه ولا تعيش معاه من غير جواز؟

-- طبعا أعيش معاه من غير جواز لو مش هيحصلي مشاكل عائلية

- وضحيلي أسبابك

-- في فيلم سهر الليالي فيه جملة كده بيقوله ""هو أنت فاكر الجواز إيه؟ بوس وأحضان وبس"" هو غالبًا المصريين كلهم فاكرين الجواز بوس وأحضان وبس. لو احنا بنحب بعض وناقصنا إننا نصحى كل يوم على وش بعض وعايزين نكون دايمًا سوا وعايزين البوس والأحضان كمان، يبقى نعيش سوا، لكن الجواز معناه مسؤولية، معناه إننا ممكن ناخد قرار نجيب عيال أو لا، معناه إننا ممكن نضحي علشان بعض بشغل، معناه عيلتين مش مجرد واحد بس. طبعًا كل الحب والعيال والتضحية موجودين كمان في العيشة سوا، بس وقت ما نتعب ممكن نقرر ننفصل، لكن الجواز يبقى اسمها نقرر نتطلق.

ده رأي، رغم إن المجتمع هيحترم كون البنت مطلقة، أكتر بكتير من لو عرف إنك انفصلتي عن واحد كنتي عايشة معاه وهو مش جوزك أصلًا، ده لو المجتمع عرف يعني، بس وهو المجتمع عاوز يعرف ليه؟ سواء اتجوزتي أو اطلقتي أو صاحبتي، إيه اللي حشره؟

- ناخد اتصال تليفوني كمان، اتفضلي قولي رأيك في السؤال المطروح

-- لا ده ولا ده

- نعم!

-- العيشة من غير جواز دي ماقدرش اعملها، عندي حاجز ديني ناحية الموضوع مش هينفع اتجاوزه، في نفس الوقت أنا مش هقدر أهتم ببني آدم واديله جزء كبير من حياتي وكدة، فالاتنين مش نافعين معايا.

- اتفضلي مع السلامة.. شكرًا