• اكتب معانا
  • ماتنسناش
  • تابعنا
الموضوع اللي جاي
إيطاليا وافقت ترجع لمصر القطع الأثرية اللي تم تهريبها مع بعثة دبلوماسية
الموضوع اللي فات
مكان اعتكاف الرسول في مكة هيتحول لمزار سياحي

تحليل مصر وروسيا: "الهمبكة" زي الدعم بتوصل للمستحقين

مع السلامة يا مونديال

تعرف حكاية همبكة؟ همبكة زي ما عرفته، هو مواطن مشهور باسمه الحركي، دون أن يكون اسمه الأصلي معروفًا. همبكة كان دايمًا حاجز لنفسه مكان وسط قائمة مرشحي الانتخابات البرلمانية في آخر عهود مبارك. تبدأ الدعاية الانتخابية فتنطلق مسيرات مزدحمة تهتف باسم "همبكة" وبوسترات تغرق الشوارع. همبكة يحسسك إن الانتخابات محسومة قبل بدايتها، لكنه عمره ما كسب، عمره ما جاب أكتر من 600 صوت، لإن الهمبكة عمرها ما هتكسب، لا في انتخابات ولا في كورة.

يشاع أن حسن شحاتة، وقت الجيل الذهبي لمنتخب مصر، دخل غرفة الملابس بين شوطي ماتش البرازيل وهو خسران 3/1، وقال للاعيبته "العبوا لعبكم"، جملة بعيدة تمامًا عن أي فنيات أو تكتيك أو حتى تخطيط، بس يبدو إن اللاعيبة فهموها بشكل ما. لو كرر كوبر جملة شحاتة في ماتش امبارح أو في أي ماتش، اللاعيبة مش هتعرف هو قصده إيه، بس الحقيقة إن المنتخب امبارح لعب لعبه، مش أكتر ولا أقل.

 بعد نهاية ماتش بلجيكا الودي اللي خسرناه 3 صفر، صرح كوبر بإنه مطمئن على هجوم المنتخب، ربنا يثبت قلبك دايمًا يا سيدي.

الملخص لو مش عاوز تقرا

الفرق بيكونلها سيستم مبنية عليه، يعني مثلًا برشلونة مع جوارديولا كانت فرقة مبنية على الاستحواذ وتحريك الكورة لخلق ثغرات في دفاعات الخصوم. ليفربول مع كلوب فرقة مبنية على الضغط العالي وسرعة التحول من المناطق الدفاعية للهجومية. كوبر بيدرب مصر بقاله 3 سنين، بنى فريقه على التكتلات الدفاعية والتمركز في الخطوط الأخيرة من الملعب، ولو عاوز تجيب جول يبقى هتستغل المساحات اللي ورا دفاعات الخصم، بالاعتماد على سرعة ومهارة صلاح رقم 1 وربنا يكرمنا من عنده. عشان كده كل ماتشاتنا مع كوبر بتنتهي 1/0 أو 2/1، وعشان كده كل الفرق اللي خلقها ربنا بتستحوذ مننا على الكورة وبتاخد مننا نص الملعب، من أول بلجيكا وأورجواي، لحد الكونغو وغينيا.

طب لما يحصل العكس؟ لما ظروف الماتش أو حتى الفريق الخصم، يجبرك إنك تستحوذ على الكورة ويسيبلك نص الملعب ويسيبلك الكورة، هيحصل إيه؟ هتخسر 3/1 من فريق ممكن الزمالك مع كابتن إيهاب جلال يكسبه.

الشوط الأول: الهلك والهلك الآخر

روسيا بدأت تضغط على المنتخب ضغط عالي بشكل سريع في أول 10 دقايق من الماتش، ووضح على لاعيبتنا ارتباك وصعوبة في نقل الكورة، وميس باصات رايحة جاية، بعد أول ربع ساعة من الماتش كان المنتخب اكتسب ثقة خليته يخف الميس باص شوية، يستحوذ على الكورة عشان يكون صاحب المبادرة. بس أنت أصلًا فريق مش بتاع مبادرات، أنت أكل عيشك إنك تستغل اندفاع الخصم، لو خصم وقف قدامك وقالك لا خلاص أنا مش هندفع، هتعمله إيه؟ كل اللي تقدر تعمله زي ما عملت امبارح، باصات لا نهائية بعرض الملعب، وبعض الجمل المبتكرة بين مروان وصلاح ومحاولات تسديد ومرور فردي من تريزيجيه لفك التكتل. طبعًا كل الابتكارات دي مجرد "هلك".

المنتخب الروسي لعب في الشوط الأول عدد لا نهائي من العرضيات، في الفاضي برضه، وكام شوطة من بعيد يبان عليهم إنهم خطر، بس لا هما مش خطر ولا حاجة أنت بيتهيألك. لو استمر الشوط الأول لمدة ساعة ونص كان هيخلص تعادل.

الشوط التاني: هو في إيه؟

هل نقدر نقول إن كوبر نزل الشوط التاني فاتح خطوطه وبيهاجم بأعداد كبيرة، وده اللي اتسبب في استقبال 3 أهداف منهم واحد دخل قبل ما ناخد بالنا إن الشوط بدأ أصلًا؟ الإجابة لأ. طب إيه اللي حصل أصلًا؟ بعيدًا عن الأخطاء المباشرة من المدافعين، في الكورة بيقولوا لو في فريق عاوز تكسبه، يا تلعب بخطة مضادة لخطته، يا تلعب بخطة المراية، يعني تنسخ طريقة لعبة بالظبط، مدرب روسيا نزل الشوط التاني ونفذ النقطة دي بشكل كبير، سابلنا الكورة وسابنا نفرح بباصات بعرض الملعب واكتفى إنه يلعب كور مباشرة في عمق دفاعنا، جربوها ونفعت.

تغييرات كوبر: زين زي عبيد

في ظل اللي كان بيحصلنا في الشوط التاني، طلعت شوية أصوات تصرخ وتقول فين شيكابالا وتغييرة وردة اتأخرت ليه؟ كهربا كان لازم يبدأ.. إلخ. مش نوع من الإحباط بس والله لو كوبر بعت جاب حسين الشحات من الإمارات ومؤمن زكريا من السعودية وباسم مرسي وصالح جمعة من الجونة والساحل، برضه ماكناش هنجيب أجوال، فيصبح زين زي عبيد. كهربا اللي ظهر في ماتش أورجواي بشكل أفضل من مروان، ماعملش حاجة امبارح ومش ذنبه، ببساطة نص ملعب أورجواي كان فيه مساحات يقدر كهربا يجري فيها ويستغلها، لكن هيعمل إيه قصاد التكتلات دي؟ عمرنا ما اتدربنا على اللعب قصاد تكتيك زي ده، وعمرنا مع كوبر ما فكرنا نوجد حلول مختلفة. أنسب حل في التكتلات دي هي المهارة الفردية أو الشوط من بعيد، وطبعًا إنك تعبي أكبر قدر من المهاجمين داخل المنطقة وتقعد تسقطلهم في كور وتعملهم كروسات.

مع السلامة يا كوبر.. وداعًا أيها الغريب وماتجيش هنا تاني

عشان الهمبكة تكتمل كان لازم مدافع روسيا يعمل فاول مالوش أي تلاتة لازمة من جوا المنطقة، فيتحسب بينالتي، والناس على القهوة تندمج في الحسابات والدعوات والآمال والهمبكة.. إلخ، بس احنا برضه مانستاهلش ولا كنا نستاهل في ماتش أورجواي، الماتشين مافيش فيهم فرصة حقيقية توحد ربنا. كوبر من بداية ولايته كان بيلعب على التكتل والتقفيل الدفاعي ويفشل برضه، فتلاقينا بنستقبل أهداف في الدقايق الأخيرة عادي، وتفضل الكور العرضية والكور الثابتة بتعملنا مشكلة، وتمركز قلبين الدفاع عاوز ضرب النار، أمال لعب دفاعي إيه اللي بنلعبه؟

مع السلامة يا عم كوبر. نتمنى المدرب الجاي مايكونش بيحتقرنا وبيحتقر إمكانياتنا بنفس القدر، أو يحتقرنا بشكل أقل، نتمنى اتحاد كورة أفضل وحكومة أفضل وعالم أرحب، نتمنى كاس عالم بييجي كل 4 سنين مش 28 سنة، نتمنى لاعيبة كتيرة من عينة صلاح ووردة وتريزيجيه وحجازي ورمضان، على اختلاف موهبتهم وتأثيرهم، فكلهم متخلصين من عقدة الأهلي والزمالك، وأول ما طلعوا بطاقة راحوا يحترفوا ومش ناويين يرجعوا قريب.

في النهاية تمنياتي القلبية للمنتخب السعودي بالخسارة، مش عشان حاجة والله، بس عشان مانسمعش عبارة سيبوا الماتش للسعودية عشان تصعد، لإن ساعتها ممكن نحط صاعق الناموس في بوقنا ونموت، وهو ماتش مش مستاهل بين منتخبين "همبكة"

Home
خروجات النهاردة
Home
Home