25 ساعة فقط اتدربهم الطفل منصور أنيس -14 سنة- علشان يكون من أصغر طيارين العالم ويقود أول رحلاته. الولد اللي من أصل هندي، اتولد واتربى في الشارقة وبدأ التدريب من وهو عنده 7 سنين مع عمه اللي بيشتغل طيار في الهند. قرر منصور يكمل حياته كطيار وهو عنده 13 سنة، وسافر مع والدته كندا وبدأ التدريب في أكاديمية طيران، رئيس الأكاديمية كان متردد في الأول من قبوله، لكن مع ذكائه وفهمه الكبير قبل واتعلم فعلًا. منصور قال في تصريحات للخليج تايمز إن فيه حاجات اتعلمها من عمه فادته في الأكاديمية.

"منصور" قال كمان: "كنت حاسس بتوتر لكن كنت مستعد للطيران وكنت متحمس إني أجرب أول رحلة ليا، اللي كانت حوالي 12 دقيقة، وكنت خايف من لحظة الهبوط وكانت صعبة فعلًا بس نجحت، ونفسي أكون طيار في الطيران الإمارتي". "منصور" رجع الشارقة واحتفل بقيادته للطيارة.